قىرعىزستان پرەزيدەنتىنىڭ قارىنداسىنا ءسوز سالعان جىگىت قاماۋعا الىندى

قىرعىزستان پرەزيدەنتىنىڭ ءباسپاسوز حاتشىسى اسكات الاگوزوۆ الەۋمەتتىك جەلىدە تاراعان اقپاراتتى راستادى. مەملەكەت باسشىنىڭ جيەنى ءلاززات نۇرقوجاەۆاعا ءسوز سالعان جىگىت ۇستالدى, دەپ حابارلايدى qandastar.kz.

بۇل تۋرالى سادىر جاپاروۆتىڭ ءباسپاسوز حاتشىسى اسحات الاگوزوۆ ءوزىنىڭ Facebook-تەگى پاراقشاسىندا جازدى.

«پرەزيدەنت سادىر جاپاروۆتىڭ ءىنىسىنىڭ قىزىنىڭ جىگىتى قۇقىق قورعاۋ ورگاندارىنىڭ وكىلدەرىمەن ۇستالعانىن راستايمىز», — دەدى الاگوزوۆ.

مەملەكەت باسشىسىنىڭ ءباسپاسوز حاتشىسى جاس جىگىتتىڭ بويجەتكەنگە ەرەكشە ۇسىنىس جاساۋ ارقىلى تانىلعانىن اتاپ ءوتتى.

ء«لاززات نۇرقوجوەۆانىڭ جىگىتى وعان تىكۇشاقتا ۇيلەنۋ تۋرالى ۇسىنىس بىلدىرگەن سوڭ تانىلدى. جاس جىگىتتىڭ نەگىزگى ماقساتى ءوز قىزمەتىن جاسىرۋ ءۇشىن بيلىكتەن «كرىشا» ىزدەدى دەۋگە تولىق نەگىز بار», — دەپ قوستى ول.

ەسكە سالايىق, قىرعىزستان پرەزيدەنتى سادىر جاپاروۆتىڭ قارىنداسى ءلاززات نۇرقوجاەۆاعا سۇيىكتىسى ۇيلەنۋگە ءسوز سالۋ ءۇشىن جاستار ورۋ-ساي شاتقالىنا تجم-ءنىڭ تىكۇشاعىمەن ۇشىپ بارعان.

جاپاروۆ بولاشاق كۇيەۋ بالاسىنىڭ بۇل قىلىعىن قۇپتامايتىنىن ايتتى. سونداي-اق قىرعىستان پرەزيدەنتى تجم-عا جاڭادان ساتىپ الىنعان تىكۇشاقتار ءوزىنىڭ قۇنىن اقتاۋ ءۇشىن كوممەرتسيالىق ماقساتتا پايدالانۋعا رۇقسات ەتىلگەنىن اتاپ ءوتتى.

«بۇرىن مەن باسقالاردى سىنايتىن ەدىم, ەندى ءوزىمنىڭ الدىمنان شىقتى. قارىنداسىم ءۇشىن حالىقتان كەشىرىم سۇرايمىن. ءالى جاس, بىراق قوعامنىڭ سىنىن كورىپ وتىر. بۇل وقيعادان ساباق الادى دەپ ويلايمىن», — دەدى جاپاروۆ.

دەرەكەرگە سۇيەنسەك, كۇيەۋ جىگىت بىرنەشە كۇننەن بەرى ەسىرتكى ساۋداسىمەن اينالىسقان دەگەن كۇدىكپەن ۋاقىتشا ۇستاۋ يزولياتورىندا وتىر.