جاڭالىقتار
قىرعىزستاندا ەكس-پرەزيدەنت اتامباەۆتىڭ وتباسىن ميليتسيا كۇشتەپ ۇيدەن شىعارىپ جىبەرگەن
قىرعىزستاننىڭ بۇرىنعى پرەزيدەنتى المازبەك اتامباەۆتىڭ وتباسىن ميليتسيا كۇشتەپ ۇيدەن شىعارىپ جىبەرگەن. بۇل تۋرالى الەۋمەتتىك جەلىلەردە ونىڭ بالالارى ءاليا شاگيەۆا مەن قادىربەك اتامباەۆ مالىمدەدى,— دەپ حابارلايدى qandastar.kz
Dalanews.kz قىرعىزستاندىق باق-قا سىلتەپ جازعانداي, قوي-تاش اۋىلىنداعى ۇيدەن ميليتسيا شىعارىپ جىبەرگەن. ميليتسيا قىزمەتكەرلەرى زاتتاردى شىعارىپ, ارنايى كونتەينەرگە تيەگەن.
ءاليا شاكيەۆا بۇل جاعدايعا قاتىستى «تاۋ-تاۋ بولىپ ۇيىلگەن زاتتارمەن دالادا قالدىردى» دەدى.
اتامباەۆتار وتباسى سوت پروتسەستەرى ءالى جالعاسىپ جاتقاندىقتان, بۇل ارەكەتتى زاڭسىز دەپ ەسەپتەيدى.
كەيىنىرەك قادىربەك اتامباەۆ ولاردىڭ ۋاقىتشا تۋىستارىنىڭ ۇيىندە تۇرىپ جاتقانىن ايتتى.
ەسكە سالايىق, بۇرىنعى پرەزيدەنتتىڭ ءۇيى ورنالاسقان قوي-تاش اۋىلىنداعى جەر تەلىمى مەملەكەتكە قايتارىلعان. سوت شەشىمىنە سايكەس وعان ىرگەلەس اۋماق تا مەملەكەتكە بەرىلدى.
بۇعان دەيىنگى قوي-تاشتاعى وقيعا
2019 جىلعى 7 تامىزدا قىرعىزستاننىڭ ارنايى جاساعى المازبەك اتامباەۆتىڭ قوي-تاشتاعى رەزيدەنتسياسىن كۇشتەپ الۋعا تىرىستى. كەلەسى كۇنى ءىىم مەن ۇقمك بىرلەسىپ, ەكىنشى ارنايى وپەراتسيا وتكىزىپ, ەكس-پرەزيدەنتتى ۇستاپ اكەتكەن بولاتىن.
وقيعا كەزىندە اتامباەۆتىڭ جاقتاستارى كۇشتىك قۇرىلىمدارعا تاس لاقتىرىپ, قوقىس پەن دوڭگەلەكتەردى ورتتەگەن. قاقتىعىس ەكى كۇنگە سوزىلىپ, 136 ادام جارالانىپ, ءبىر ارنايى جاساق قىزمەتكەرى وقتان قازا تاپتى.
ەكس-پرەزيدەنتكە بىرقاتار قىلمىستىق ءىس بويىنشا ايىپ تاعىلعان:
- 2019 جىلعى قوي-تاشتاعى جاپپاي تارتىپسىزدىككە قاتىسۋ
- جەمقورلىق
- قىلمىستىق جولمەن كەلگەن اقشانى زاڭداستىرۋ
- تۇركيا ازاماتتارىنا زاڭسىز پاسپورت بەرۋ
2020 جىلعى قازانداعى جاپپاي تارتىپسىزدىكتى ۇيىمداستىرۋ ىستەرى بويىنشا دا ايىپ تاعىلعان. الايدا سوڭعى ەكى ءىس بويىنشا اتامباەۆ اقتالعان.
قوي-تاش وقيعاسىنا قاتىستى ماتەريالدار جەر تەلىمدەرى مەن جەو-عا كومىر جەتكىزۋ ىستەرىمەن بىرىكتىرىلگەن.
ەسكە سالايىق, اتامباەۆ نازارباەۆ تۇسىندا «قازاقستان قىرعىز سايلاۋىنا ارالاستى», «قازاق بيلىگى ۇرى» دەپ سىن ايتىپ, نازارباەۆتىڭ ءوزىن ديكتاتور دەپ اتاعان ەدى.
