قىركۇيەكتەن باستاپ ءموبيلدى اۋدارىمدار تەكسەرىلە باستايدى

قارجى مينيسترلىگى ءموبيلدى اۋدارىمدار ارقىلى زاڭسىز كاسىپكەرلىكپەن اينالىساتىنداردى انىقتاۋ ماقساتىندا جاڭا باقىلاۋ جۇيەسىن ەنگىزبەك. بۇل تۋرالى ءماجىلىس كۋلۋارىندا قارجى ۆيتسە-ءمينيسترى ەرجان ءبىرجانوۆ مالىمدەدى, دەپ حابارلايدى Qandastar.kz اقپارات پورتالى.

ونىڭ ايتۋىنشا, ءتيىستى بۇيرىق دايىندالىپ قويعان جانە ول جاڭا زاڭ كۇشىنە ەنگەن سوڭ 60 كۇن ىشىندە قابىلدانباق. “بۇگىن زاڭ قابىلداندى. ەندى ءبىز نورماتيۆتىك قۇجاتتى راسىمدەپ, قىركۇيەك ايىنان باستاپ ناقتى ىسكە كىرىسەمىز”, – دەدى ۆەدومستۆو وكىلى.

ۆيتسە-مينيستر جاڭا تالاپتاردىڭ كىمدەرگە قاتىستى بولاتىنىن دا ناقتى ءتۇسىندىرىپ ءوتتى.

“اناسى قىزىنا, اكەسى ۇلىنا نە تۋىستارى ءبىر-بىرىنە اقشا اۋدارسا, ەشقانداي ماسەلە تۋىندامايدى. ءتىپتى سوما 1 ميلليون, 2 ميلليون تەڭگە بولسا دا. ەڭ باستىسى – ءۇش شارتتىڭ ۇشەۋى قاتار ورىندالۋى كەرەك. ءبىرىنشىسى – ءبىر ادامعا 100 ءتۇرلى تۇلعا اقشا جىبەرۋى ءتيىس. ەكىنشىدەن, بۇل اۋدارىمدار ءۇش اي قاتارىنان جالعاسۋى قاجەت. ءۇشىنشىسى – جالپى سوما 1 ميلليون تەڭگەدەن اسۋى شارت”, – دەدى ەرجان ءبىرجانوۆ.

مامانداردىڭ سوزىنشە, بۇل جۇيە بيزنەسكە قاتىستى زاڭسىز ءموبيلدى وپەراتسيالاردى انىقتاپ, سالىقتان جالتارۋعا توسقاۋىل قويۋدى كوزدەيدى. ال قاراپايىم ازاماتتاردىڭ تۋىستارىمەن جاسايتىن جەكە اۋدارىمدارىنا ەشقانداي شەكتەۋ قويىلمايدى.