جاڭالىقتار
قىتاي قازاقستاننان جىلىنا 20 مىڭ توننا شوشقا ەتىن ساتىپ الماق
قىتاي قازاقستاننان جىلىنا 20 مىڭ توننا شوشقا ەتىن يمپورتتاۋدى كوزدەپ وتىر, دەپ حابارلايدى qandastar.kz.
شانحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ 24-ءشى وتىرىسى اياسىندا قىتاي ەت قاۋىمداستىعىنىڭ وكىلدەرى سولتۇستىك قازاقستان وبلىسىنداعى «EMC Agro» ونەركاسىپ كەشەنىنە بارعان.
اۋىل شارۋاشىلىعى مينيسترلىگىنىڭ ءباسپاسوز قىزمەتىنىڭ اقپاراتىنشا, كەلگەن قوناقتارعا مال سويۋدان باستاپ ودان ءارى ىشكى نارىققا شىعارۋ ءۇشىن ولشەپ-وراۋعا دەيىنگى بارلىق وڭدەۋ تسيكلى كورسەتىلدى. بارلىق پروتسەسس اۆتوماتتاندىرىلعان جانە حالىقارالىق سانيتارلىق-ەپيدەميالىق تالاپتارعا سايكەس كەلەدى.
ساپانى باقىلاۋدى تاۋلىك بويى نەمىس اناليزاتورلارىمەن جابدىقتالعان زەرتحانا قامتاماسىز ەتەدى. دايىن ءونىم ارنايى مۇزداتقىش تسەحتا ساقتالادى.
كاسىپورىننىڭ جۇمىسىمەن تانىسقاننان سوڭ, تاراپتار ىنتىماقتاستىق پەرسپەكتيۆالارىن تالقىلادى. قىتاي ەت قاۋىمداستىعى جىلىنا 20 مىڭ توننا شوشقا ەتىن يمپورتتاۋعا قىزىعۋشىلىق تانىتتى.
ءوز كەزەگىندە, «EMC Agro» كومپانياسىنىڭ ونەركاسىپتىك كەشەنى قىتايعا شىعارىلاتىن ءونىمنىڭ 60% -عا جۋىعىن جەتكىزۋگە دايىن.
«بۇگىندە قىتاي ەت قاۋىمداستىعىنا كىرەتىن كومپانيالاردىڭ ءبىرى جەرگىلىكتى كاسىپورىننان شوشقا ەتىن ساتىپ الۋدى جوسپارلاپ وتىر. اڭگىمە جىلىنا 20 مىڭ توننا تۋرالى بولىپ وتىر. بىراق ءبىز قوي مەن سيىر ەتىنە دە مۇددەلىمىز», – دەپ اتاپ ءوتتى قىتاي ەت قاۋىمداستىعىنىڭ سيىر ەتىن يمپورتتاۋشىلار جانە ەكسپورتتاۋشىلار كلۋبىنىڭ پرەزيدەنتى ما گۋانشەن.
«قىتايدىڭ تالاپتارى جوعارى ەكەنىن ءتۇسىنۋ كەرەك. جەتكىزۋ كولەمى تۇراقتى, شيكىزات قاۋىپسىز بولۋى ءتيىس. ءبىزدىڭ ەتىمىز جوعارى ساپالى, ءبىز ءوز ونىمىمىزگە كۇمان كەلتىرمەيمىز, جەمىستى ىنتىماقتاستىققا دايىنبىز. كورشى نارىق ءبىز ءۇشىن ماڭىزدى», – دەدى «ەمس اgro» كومپانياسىنىڭ باسشىسى ەرجان ەلەۋباەۆ.
