قىتاي كومپانياسى كەلەر جىلى ەلىمىزدە بيداي وڭدەيتىن زاۋىت سالادى

فوتو: اشىق دەرەككوز

قىتاي كومپانياسى كەلەر جىلى ەلىمىزدە بيداي وڭدەيتىن زاۋىت سالادى, دەپ جازدى qandastar.kz

پرەمەر-مينيستر ولجاس بەكتەنوۆ Dalian Hesheng Holdings Group Co., Ltd. كومپانيالار توبىنىڭ باسقارما توراعاسىنىڭ ورىنباسارى ما حۋنحان باستاعان قىتاي دەلەگاتسياسىمەن كەزدەسۋ وتكىزدى. اگروونەركاسىپ كەشەنى سالاسىنداعى ينۆەستيتسيالىق ىنتىماقتاستىق ماسەلەلەرى, سونداي-اق كومىر حيمياسى مەن ماشينا جاساۋ سالالارىنداعى ءوزارا ءىس-قيمىل پەرسپەكتيۆالارى تالقىلاندى. قىتايلىق كوپسالالى Dalian Hesheng Holdings كومپانياسى بيدايدى وڭدەۋ جانە اشىتۋ سالاسىنداعى تەحنولوگيالىق پاتەنتتىڭ يەگەرى سانالادى جانە وزىق تسيفرلىق تەحنولوگيالاردى پايدالانادى.

اقمولا وبلىسىندا بيدايدى تەرەڭدەتە وڭدەۋ بويىنشا تىگىنەن كىرىكتىرىلگەن ونەركاسىپتىك پارك قۇرىلىسىنىڭ جاڭا ينۆەستيتسيالىق جوباسىن ىسكە اسىرۋ جوسپارلانىپ وتىر. ءبىرىنشى كەزەڭدە ينۆەستيتسيا كولەمى $500-800 ملن-دى قۇراسا, جوبانى ىسكە اسىرۋدىڭ ەكىنشى جانە ءۇشىنشى كەزەڭدەرى تاعى $1 ملرد-قا باعالانۋدا. العاشقى كەزەڭدە قايتا وڭدەۋ قۋاتى جىلىنا 3 ملن تونناعا دەيىن ءوسۋ پەرسپەكتيۆاسىمەن 1 ملن توننانى قۇرايدى. 2 مىڭعا جۋىق جۇمىس ورنى اشىلادى. جوبادا كومىر جىلۋ ەلەكتر ستانساسى مەن كومىر حيمياسى كەشەنىنىڭ قۇرىلىسى دا قاراستىرىلعان. كومىردى قايتا وڭدەۋ ناتيجەسىندە جىلىنا 150-400 مىڭ توننا سۇيىق اممياك الىنادى دەپ كۇتىلۋدە.