Qytaı Tramppen kelisim jasaýǵa daıyn ekenin málimdedi

Foto:china-briefing.com satynan alyndy

Quartz jarııalaǵan habarlamaǵa silteme jasaı otyryp Aikyn.kz amerıkalyq jáne qytaılyq bıliktiń kelissózder ústeline otyrý yqtımaldyǵyn boljaıdy, dep jazdy qandastar.kz

Prezıdent Tramp: «Olar bizge aıtarlyqtaı mańyzdy bir nárse usynbaıynsha, men tarıfterdi tómendetpeımin». Foto nytimes.com saıtynan alyndy. Avtorlyǵy. Doug Mills 

Baj salyǵyn engizý men ózara sózben shúıligý jaǵdaıynda ótken birneshe aptadan keıin Qytaı bıligi AQSh-pen saýda kelissózderin bastaýǵa daıyn ekenin bildirdi. Alaıda bul úshin AQSh-tyń kelissózge shynaıy peıilmen, ashyq nıetpen kelýi tıis ekenin eskertken.

«Eger AQSh kelissóz júrgizgisi kelse, ol óziniń shynaıylyǵyn kórsetip, qate áreketterin túzetýge jáne birjaqty engizilgen baj salyǵyn joıýǵa daıyn bolýy kerek», – delingen Qytaıdyń Saýda mınıstrliginiń jumada (2 mamyr) taratqan málimdemesinde. Osylaısha, Beıjiń Vashıngton tarapynan Qytaı taýarlaryna qoıylǵan 145%-dyq tarıfter joıylýyn kútetinin kórsetken.

Qytaı jaǵy prezıdent Donald Tramp engizgen baj salyǵyna jaýap retinde 125%-dyq qarsy tarıfter engizip, strategııalyq mańyzdy sırek kezdesetin mıneraldarynyń eksportyna shekteý qoıǵany belgili. Alaıda eki tarap ta keıbir mańyzdy ónimderge qatysty erekshe jeńildikter usynyp otyr.

Qytaıdyń Saýda mınıstrligi Qytaı úkimeti Tramp ákimshiliginiń sońǵy bastamalaryn «baǵalap jatqanyn» aıtady. Sonymen birge mınıstrlik: «Sóz ben istiń arasynda aıyrmashylyq bolsa nemese kelissóz degendi jeleý etip qysym kórsetý men bopsalaý júrgizilse, ol Qytaıǵa júrmeıdi», – dep eskertken. Bul talap oryndalmasa, «shynaıylyqtyń joqtyǵyn» kórsetip, ózara senimge odan ári nuqsan keltiredi delingen.

Qytaı bıligi: «Sóz ben istiń arasynda aıyrmashylyq bolsa, qysym kórsetý men bopsalaý júrgizilse, ol Qytaıǵa júrmeıdi». Foto Quartz saıtynan alyndy. Avtorlyǵy: Getty Images / Lintao Zhang

Mınıstrliktiń sońǵy málimdemesi – eki el arasyndaǵy keńirek dıplomatııalyq dıalogtiń bir bóligi. Ár tarap kelissóz bastamasyn qarsy taraptan kútip otyr jáne eshqaısysy álsizdik belgilerin tanytqysy kelmeıdi.

Juma kúni (2 mamyr) jasalǵan málimdemede Saýda mınıstrligi AQSh-tyń joǵary laýazymdy ókilderi kelissóz bastaý týraly birneshe ret ótinish jasaǵanyn habarlady. Alaıda Tramp bul bastama Qytaı Halyq Respýblıkasynyń tóraǵasy Sı zınpın tarapynan bolǵanyn aıtyp otyr. Eshkim óziniń álsizdigin kórsetkisi kelmeıdi.

Donald Tramp Time jýrnalyna bergen suhbatynda Sı zınpınniń oǵan qońyraý shalǵanyn aıtqan. Al Qytaı sheneýnikteri bul málimdemeni «jalǵan jańalyq» dep atap, tarıfter boıynsha eshqandaı qońyraý nemese kelissóz bolmaǵanyn jarııalady.