«Qytaıda 8 jyl turdym»: Toqaev Sınhýa agenttigine bergen suqbatynda ne týraly aıtty?

Foto: Tengrınıýs

Memleket basshysy Qytaıda turǵan kezde sol eldiń mádenıetin, tarıhyn, tili men ádet-ǵurpyn bilgenin atap ótti.

«Shynynda da, keıde men áriptesime mańyzdy oılardy múmkindiginshe dál jetkizý nemese kúndelikti ómirdegi qyzyqty taqyryptardy talqylaý úshin qytaı tilinde áńgimelesemin. Stýdenttik ómirdegi eń jarqyn estelikter men dıplomatııalyq mansabymnyń bastalýy Qytaımen baılanysty. Jalpy Qytaıda 8 jyl turdym. Osy ýaqyt ishinde men Qytaı mádenıetin, tarıhyn, tili men ádet-ǵurpyn zertteýge tereń boılap, qytaı taǵamdarynyń baılyǵy men alýan túrliligin bildim», — dedi prezıdent.

Sondaı-aq Qasym-Jomart Toqaev suqbatta Qytaı halqynyń eńbekqorlyǵyn da tilge tıek etti. «Meni erekshe qyzyqtyratyny – bilim berýdegi pragmatıkalyq, nátıjege baǵyttalǵan kózqaras jáne úlkenge qurmet, eńbekqorlyq sııaqty dástúrli qundylyqtar. Munyń bári qazirgi Qytaıda qalyptasqan áleýmettik atmosferaǵa da áser etedi. Bul tájirıbe maǵan Qytaı qoǵamynyń biregeıligin tereńirek túsinýge jáne mádenıetaralyq daǵdylardy damytýǵa múmkindik berdi. Qytaı mentalıteti men órkenıetin túsiný de qazirgi geosaıası jaǵdaıda qazaq-qytaı qarym-qatynasynyń mańyzyn túsinýde belgili bir artyqshylyq beredi.