قىتايعا بارعان قازاق بلوگەرلەرىنىڭ ۇستىنەن ءىس قوزعالدى

قازاقستاندىق بلوگەردىڭ قىتايدا تۇسىرگەن پرانك ۆيدەولارى ۇلكەن رەزونانس تۋدىردى. قىتاي حالقى بلوگەردىڭ ارەكەتىن زاڭسىز دەپ تاۋىپ, ونى جاۋاپقا تارتۋدى تالاپ ەتۋدە, دەپ حابارلايدى Qandastar.kz  Skifnews.kz اقپارات پورتالىنا  سىلتەمە جاساپ.

قىتايدا تۇسىرىلگەن ۆيدەولار نەلىكتەن داۋ تۋعىزدى?

سوڭعى كۇندەرى قىتايلىق الەۋمەتتىك جەلىلەر مەن جاڭالىقتار پورتالدارىندا قازاقستاندىق ينفليۋەنسەردىڭ ارەكەتى قىزۋ تالقىلانۋدا. جەرگىلىكتى باق-تىڭ مالىمەتىنشە, بلوگەر قىتايدا «ۇرلىق جوق» دەگەن سوزگە سەنبەي, وزىنشە «تەكسەرىپ» كورمەك بولعان. ول گۋانچجوۋ مەن شانحايدا ءجۇرىپ, قۇربىسىنىڭ قالتاسىنان بايقاتپاي تەلەفونىن الىپ, ونى ءوتىپ بارا جاتقان قىتاي ازاماتىنىڭ قولىنا ۇستاتادى. سوسىن دوسىنا تەلەفونىڭدى «مىنا ادام ۇرلادى» دەپ كورسەتەدى. سونىمەن قاتار, ەر ادامدارع جاناسىپ, قولىنان ۇستاپ, يىعىنا سۇيەنىپ, اياعىنا ءتيىسىپ, ولاردىڭ رەاكتسياسىن ۆيدەوعا تۇسىرگەن.

قىتاي ازاماتتارى نارازىلىق بىلدىرۋدە

Sohu.com, news.qq.com جانە Sina.com.cn سياقتى ءىرى قىتايلىق مەديا پلاتفورمالار بۇل ارەكەتتەردى قوعامدىق تارتىپكە قايشى, قىتايلىقتاردىڭ مەيىرىمدىلىگىن تەرىس پيعىلدا كورسەتۋ دەپ باعالادى. ۆيدەوداعى قاراپايىم ازاماتتاردىڭ ار-نامىسى تاپتالدى, قىتايدىڭ حالىقارالىق يميدجىنە كەرى اسەر ەتتى دەپ اتاعان.

قىتاي زاڭدارى نە دەيدى?

قىتاي زاڭناماسىنا سايكەس, جالعان ايىپ تاعۋ, قوعامدىق ءتارتىپتى بۇزۋ, جەكە تۇلعالاردىڭ رۇقساتىنسىز ۆيدەو تاراتۋ جانە كوپشىلىك الدىندا قورلاۋ قاتاڭ جازالانادى.

زاڭگەر حان ءدۋنياندىڭ ايتۋىنشا, مۇنداي ارەكەت:
• اكىمشىلىك ايىپپۇلعا نەمەسە
• قاماۋعا الۋ مەن دەپورتاتسياعا دەيىن اپارۋى مۇمكىن.

جابىرلەنۋشى ازاماتتار بلوگەردەن:
• كەشىرىم سۇراۋدى,
• مورالدىق شىعىن وتەۋدى,
• ۆيدەو ماتەريالداردى ءوشىرۋدى تالاپ ەتۋگە تولىق قۇقىلى.

گۋانچجوۋ پوليتسياسى ىسكە ارالاستى

قىتايدىڭ تانىمال 163.com پورتالىنىڭ جازۋىنشا, گۋانچجوۋ قالاسىنىڭ پوليتسياسى تۇرعىنداردان تۇسكەن ارىزدار نەگىزىندە بلوگەردىڭ ارەكەتىنە قاتىستى تەكسەرۋ جۇمىستارىن باستاعان.

بۇل جاعداي نەنى كورسەتەدى?

بۇل وقيعا – شەتەلدە كونتەنت تۇسىرەتىن بلوگەرلەر مەن ينفليۋەنسەرلەر ءۇشىن ۇلكەن ساباق. قانداي ەلدە بولسىن:
• جەرگىلىكتى زاڭعا باعىنۋ,
• مادەنيەت پەن داستۇرگە قۇرمەتپەن قاراۋ,
• قوعامدىق ءتارتىپتى ساقتاۋ — باستى قاعيدا بولىپ قالا بەرەدى.

قىتاي باق-تارى عالامتورداعى تانىمالدىق ءۇشىن بۇلاي قوعامدى قورلاۋعا بولمايدى دەيدى.