قىتايلىقتاردىڭ داستارحانىندا قازاقستاندىق ءونىم كوبەيىپ كەلەدى – سي تسزينپين

ماقالادا سي تسزينپين قازاقستان اۋماعىندا قىتاي ينۆەستيتسياسىنا ىسكە اسىپ جاتقان جوبالاردىڭ بىرنەشەۋىنە توقتالىپ, «باتىس قىتاي — باتىس ەۋروپا» ءدالىزىنىڭ ىركىلىسسىز جۇمىس ىستەپ تۇرعانىنا نازار اۋدارادى.

«ءبىز ىسكەرلىك ىنتىماقتاستىقتا ءوزارا پايدا مەن بىرلەسىپ دامۋ رۋحىندا جاڭا تاڭعالارلىق ناتيجەلەرگە قول جەتكىزدىك. ەكىجاقتى ساۋدا-ساتتىقتىڭ بىلتىرعى كولەمى رەكوردتىق دەڭگەيدەگى 41 ملرد اقش دوللارىنا جەتتى. قىتاي قازاقستاننىڭ نەگىزگى ساۋدا سەرىكتەسى بولىپ وتىر جانە قازاقستاندىق تاۋارلاردىڭ ءىرى يمپورتتاۋشىسى. جاڭاتاس جەس-ءى, تۇرعىسىن گەس-ءى, سياقتى ستراتەگيالىق تۇرعىدان ماڭىزدى جوبالار تابىستى ىسكە قوسىلدى. شىمكەنت مۇناي وڭدەۋ زاۋىتىندا جاڭعىرتۋ جۇمىستارى مەن كۇردەلى جوندەۋ اياقتالدى. قىتاي-قازاقستان مۇناي-گاز قۇبىرلارى قاۋىپسىز ءارى تۇراقتى نەگىزدە جۇمىس ىستەپ تۇر, اۋىلشارۋاشىلىعى ونىمدەرىنىڭ بارلىق ءتۇرىن جەتكىزۋگە بايلانىستى كەدەندىك راسىمدەردى جەدەلدەتەتىن جاسىل ءدالىز قۇرىلدى, قىتايلىقتاردىڭ داستارحانىندا قازاقستاننىڭ ساپاسى جوعارى, ەكولوگيالىق تۇرعىدان تازا اۋىلشارۋاشىلىعى ونىمدەرى بارعان سايىن كوبەيىپ كەلەدى», — دەدى قىتاي باسشىسى.

قحر توراعاسىنىڭ پايىمداۋىنشا, ەكىجاقتى قارىم-قاتىناستا جاڭارتىلاتىن قۋات كوزدەرى مەن كولىك ينفراقۇرىلىمى سالاسىنىڭ الەۋەتى زور.

«سيان قالاسىندا قۇرعاق پورت قاتارعا قوسىلدى. باتىس ەۋروپا — باتىس قىتاي اۆتوجولى, قىتاي-ەۋروپا باعىتىنداعى كونتەينەرلى پويىز ىركىلىسسىز جۇمىس ىستەپ تۇر. بۇل دا ەكى ەلدىڭ دامۋىنا قۋاتتى سەرپىن بەرەدى», — دەدى سي تسزينپين.

بۇعان دەيىن حابارلانعانىنداي, 2-4 شىلدە كۇندەرى پرەزيدەنت قاسىم-جومارت توقاەۆتىڭ شاقىرۋىمەن قىتاي حالىق رەسپۋبليكاسىنىڭ توراعاسى سي تسزينپين قازاقستانعا مەملەكەتتىك ساپارمەن كەلەدى. ول سونداي-اق, شانحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ 24-ءشى وتىرىسىنا قاتىسادى.