جاڭالىقتار
«قىز ءۇشىن»: استانادا 200-دەن اسا وقۋشىنىڭ قاتىسۋىمەن جاپپاي توبەلەس بولدى
فوتو: istockphoto.com
كەشە تۇندە استانادا 200-دەن اسا وقۋشىنىڭ قاتىسۋىمەن جاپپاي توبەلەس بولدى. پوليتسيا قىزمەتكەرلەرى ءتارتىپ بۇزۋشىلاردى تۇگەل ۇستادى, دەپ حابارلايدى qandastar.kz Halyq Uni سىلتەمە جاساپ.
تۇندە استانانىڭ وڭتۇستىك-شىعىس اۋدانىندا 200-دەن اسا وقۋشى قاتىسقان جاپپاي توبەلەس بولدى. كۋاگەرلەردىڭ ايتۋىنشا, جانجال قىزعا بايلانىستى باستالعان. جاسوسپىرىمدەر اۋداندى ءبولىسىپ, توبەلەسۋ ءۇشىن كەزدەسۋ ۇيىمداستىرعان. الدىمەن ءبىر توپ 6-7 جاسوسپىرىمگە شابۋىل جاسادى, بىراق ولارعا توتەپ بەرۋ ءۇشىن ودان دا ۇلكەن توپ جينالدى, – دەلىنگەن حابارلامادا.
ودان كەيىن بۇگىن جەلىدە تاراعان ۆيدەودا قولىنا پىشاق ۇستاعان ءبىر بالا «پىشاقتايمىز بۇگىن. پىشاقتايمىز!» دەپ كۇلگەن. ونىڭ قاسىنداعى جاسوسپىرىمدەر بالاعات سوزدەر ايتىپ ءجۇر. ال كەلەسى ءبىر ۆيدەودان جەردە قيمىلسىز جاتقان بالانى بىرنەشە قارسىلاسىنىڭ جابىلىپ كەپكىلەپ جاتقانىن كورۋگە بولادى.
كەشە تۇندە استانادا №86 جانە 51 مەكتەپ وقۋشىلارى جانە ستۋدەنتتەردىڭ قاتىسۋىمەن اۋىر تارتىپسىزدىك بولدى. ءبىزدىڭ دەرەككوزدىڭ حابارلاۋىنشا, چۋگۋنكا جانە قورداي ۋچاسكەلەرىنە جينالعان 200-دەن اسا ءجاسوسپىرىم كوشە كەزىپ, وزگە جاسوسپىرىمدەرگە شابۋىل جاساپ, سوققىعا جىققان. ولاردىڭ كەيبىرەۋلەرى اشىق تۇردە پىشاق ۇستاعان. 2005 جىلى تۋعان ءجاسوسپىرىم باستاعان توپ قۇرباندارىنان قاي اۋداننان ەكەندەرىن سۇراعان. ەگەر بىرەۋ «وڭتۇستىك-شىعىس» دەپ جاۋاپ بەرسە, ونى بىردەن ۇرىپ-سوعادى. جاسوسپىرىمدەر كوشە بويىمەن «رەيد» جاساپ, «جەرۇيىق» ساياباعىنا قاراي بەت الدى. بۇل وقيعا ءتارتىپتى قالپىنا كەلتىرۋ جانە ودان ءارى جانجالداردىڭ الدىن الۋ ءۇشىن قۇقىق قورعاۋ ورگاندارىنىڭ شۇعىل ارالاسۋىن تالاپ ەتەدى, – دەلىنگەن «استانا سەرگەك» Instagram-داعى پاراقشاسىنداعى ۆيدەو سيپاتتاماسىندا.
ال استانا قالاسى پوليتسيا دەپارتامەنتىنىڭ حابارلاۋىنشا, «102» ارناسىنا ءۇيدىڭ اۋلاسىنا جاستاردىڭ جينالعانى تۋرالى حابارلاما تۇسكەن. دەرەۋ ءتارتىپ بۇزۋشىلار پوليتسيا بولىمىنە جەتكىزىلدى.
پاترۋلدىك پوليتسيا پولكىنىڭ وقيعا ورنىنا ۋاقتىلى كەلۋى جاسوسپىرىمدەردىڭ بۇزاقىلىق ارەكەتتەرىنىڭ الدىن الدى. ولار جاعدايدى انىقتاۋ ءۇشىن پوليتسيا بولىمىنە جەتكىزىلدى. جاستاردى جيناۋدىڭ ماقساتى ءبىر-بىرىمەن قارىم-قاتىناستى ناقتىلاۋ بولعان. ولاردىڭ اراسىندا كامەلەتكە تولماعاندار دا بار. قازىر وسى فاكتى بويىنشا بارلىق قاتىسۋشى, سونداي-اق كامەلەتكە تولماعانداردىڭ زاڭدى وكىلدەرى اكىمشىلىك جاۋاپكەرشىلىككە تارتىلدى, – دەلىنگەن قالالىق پد ءباسپاسوز قىزمەتىنىڭ مالىمەتىندە.
