<قىز جىبەك> ءفيلمى ۇلكەن ەكرانعا ورالدى

قازاق كينوسىنىڭ مارجانىنا اينالعان «قىز جىبەك» ءفيلمى ۇلكەن ەكرانعا ورالدى.

جارتى عاسىردان بەرى سىرى كەتسە دە, سىنى كەتپەگەن كلاسسيكالىق كارتينانىڭ جابىق كورسەتىلىمى Halyk IMAX Kinopark16 كينوتەاترىندا ءوتتى. سالتاناتتى شاراعا سۇلۋلىقتىڭ سيمۆولى بولعان مەرۋەرت وتەكەشەۆا مەن ءاسانالى ءاشىموۆ قاتىستى.

كورسەتىلىمنەن تۇسكەن قارجى قايىرىمدىلىققا جۇماسالادى. «قىز جىبەك» جىرى مەن ءفيلمى – قازاق ونەرىنىڭ شوقتىعى بيىك تۋىندىسى. العاش رەت 1970 جىلى جارىق كورگەن تۋىندى ۇزاق جىلداردان كەيىن ۇلكەن ەكراندا كورەرمەنىمەن قاۋىشتى. بۇگىننەن باستاپ ەلىمىزدەگى بارلىق Kinopark & Kinoplexx كينوتەاترلارىنان كورسەتىلەدى. بۇل كينوجوبا «قوزى كورپەش – بايان سۇلۋ» – عاشىقتار كۇنىنە ارنالعان.

مەرۋەرت وتەكەشەۆا, كينو جانە تەاتر اكتريساسى: — «قىز جىبەك» ءفيلمى – كلاسسيكا. باياعىدا ءبىزدىڭ سۇلتان اعامىز رەجيسسەر وسى ءفيلمدى قويىپ, جالپى مىناۋ, قاراڭىزشى, عابيت مۇسىرەپوۆ ستسەناري جازعان. مىناۋ مۋزىكانى كىم جازعان? نۇرعيسا تىلەنديەۆ. بۇكىل كوستيۋمدەرىن تىككەن, دەكوراتسيا ءبىزدىڭ گۋلفايرۋز يسمايلوۆا. كلاسسيكالىق كارتينا 4 كۇن كورسەتىلەدى. وسى ۋاقىت ارالىعىندا جينالعان قاراجات ەلىمىزدەگى سۋ باسقان وڭىرلەرگە الەۋمەتتىك كومەك رەتىندە اۋدارىلادى. يگى باستاماعا كەز كەلگەن تۇرعىن كينو كورۋ ارقىلى اتسالىسا الادى.

ازامات ساتىبالدى, «قازاقفيلم» اق پرەزيدەنتى: — كينونى تەلەۆيزوردان كورۋ بار, ال ەكراننان كورۋ مۇلدەم باسقا. سوندىقتان دا وسى ءبىر اسەردى قايتادان كورەرمەندەرگە سىيلاۋ باعىتىندا ءبىز وسى جوبانى جاسادىق جانە بۇل تەك قانا باسى عانا

ءبىز ءاربىر ماۋسىم سايىن قازاقتىڭ التىن قورىنداعى كينولاردى بۇكىل قازاقستان بويىنشا وسى Kinopark & Kinoplexx كينوتەاترلارىنان كورسەتىپ تۇراتىن بولامىز. بىرنەشە ۇرپاقتىڭ جۇرەگىنەن ورىن تاپقان «قىز جىبەك» ءفيلمى ءالى كۇنگە كوزى قاراقتى كورەرمەننىڭ ىستىق ىقىلاسىنا بولەنىپ كەلەدى. قىز جىبەك پەن تولەگەننىڭ ماحاببات حيكاياسى حالىق جاتقا بىلسە دە, قايتالاپ كورۋدەن جالىققان ەمەس.