«قىزدار دۇرىس وتىرا الماي جۇرگەنىن ايتتى»: سولتۇستىك قازاقستان وبلىسىندا ەكى وقۋشى قىز زورلاندى

فوتو: iStock

پاۆلودار وبلىسىندا ەكى ءجاسوسپىرىم قىز زورلاندى. زارداپ شەككەندەر اۋرۋحاناعا جاتقىزىلىپ, زورلىق جاساعان كۇدىكتى ۋاقىتشا ۇستاۋ يزولياتورىنا قامالدى. بۇل تۋرالى Stan.kz اقپارات اگەنتتىگى Tengrinews سايتىنا سىلتەمە جاساپ حابارلايدى.

پاۆلودار وبلىسى بويىنشا بالا قۇقىقتارى جونىندەگى ۋاكىل ساۋلە شاكەنەۆا كامەلەتكە تولماعانداردى زورلاۋدىڭ ەكى وقيعاسى تۋرالى مالىمدەدى. ول زارداپ شەككەن 15 جانە 17 جاستاعى وقۋشى قىزدارمەن كەزدەستى. ومبۋدسمەننىڭ ايتۋىنشا, قىزدار وزدەرىنە جاسالعان زورلىق-زومبىلىقتى مويىنداۋعا باتىلى جەتپەگەن.

«قىزداردىڭ ىشكى جان دۇنيەسىندە, جۇرەگىندە نە بولىپ جاتقانى بەلگىسىز. ولار قانداي ازاپتى باستان وتكەرىپ جاتىر?  فيزيكالىق ازاپ تۋرالى ايتپايمىن… دەگەنمەن, قىزداردىڭ ءبىرى قانشا كۇننەن بەرى دۇرىس وتىرا الماي جۇرگەنىن ايتتى. كەشە كوز جاسىنا تۇنشىعىپ, اۋىرعانىن ايتىپ جىلاپ جاتقان قىزدىڭ دىرىلدەگەن قولىنان ۇستادىم. وسىلايشا قىزعا, بۇل جاعدايعا ول كىنالى ەمەس ەكەنىن جەتكىزدىم. بۇل ارەكەتتى وعان وتباسىنداعى ادام جاساعان», – دەدى شاكەنەۆا.

ەكى جاعداي دا ءبىر اۋىلدا, ءبىر وتباسىندا بولعان.

«بۇل قىزداردى سول ادام زورلاعان. 17 جاستاعى جابىرلەنۋشىنىڭ ۇلكەن اعاسى, 15 جاستاعى جابىرلەنۋشىنىڭ اناسىنىڭ بىرگە تۇراتىن ادامى, ياعني «وگەي اكەسى». زاڭدى تۇردە جانە قان جاعىنان ولار ەكى ءتۇرلى وتباسى. بىراق ولار وزدەرىن تۋىس سانايدى. زورلاعان كۇدىكتى ەر ادامنىڭ جاقىن دوسى. ءتىپتى ولاردىڭ ۇيىندە تۇنەپتى”, – دەدى ومبۋدسمەن.

ونىڭ ايتۋىنشا, ەر ادام 29-30 جاستا.

«كۇدىكتى قاماۋعا الىندى. تەرگەۋ ءجۇرىپ جاتىر. قىزدار اۋىرعانىنا شاعىمدانعان. سوندىقتان ولار اۋرۋحاناعا جاتقىزىلدى. ولار مۇقيات تەكسەرىلۋ كەرەك جانە ولارمەن مەكتەپتىڭ پەداگوگيكالىق پسيحولوگى ەمەس, ءتيىستى ماماندىعى بار كلينيكالىق پسيحولوگ جۇمىس ىستەيدى», – دەدى شاكەنەۆا.

ۋلترادىبىستىق زەرتتەۋ ناتيجەسى كامەلەتكە تولماعان ەكى قىزدىڭ جۇكتى ەمەس ەكەنىن كورسەتتى. بالالار ومبۋدسمەنى Instagram جەلىسىندەگى پاراقشاسىندا بالالاردان وزدەرىنە جاسالعان سەكسۋالدىق زورلىق-زومبىلىق جاعدايلارى تۋرالى حاارلاۋدى سۇرادى.