«Qyzdardyń bireýi kólikten pyshaq ákelip berdi»: Prokýror Sherzattyń mert bolǵan aǵasy Nurǵanattyń jaýaptaryn oqydy

Foto: ashyq derekkóz

Sherzat Polattyń ólimine baılanysty sot otyrysynda birneshe kýáger sóz sóıledi. Prokýror Sherzattyń aǵasy marqum Nurǵanat Ǵaıypbaevtyń tergeý kezindegi jaýaptaryn oqydy, dep jazdy qandastar.kz

Bul týraly Stan.kz aqparat agenttigi habarlaıdy.

Qarjaýbaı Nurymovtyń inisi Nurǵanat Ǵaıypbaev tiri kezinde oqıǵa jaıly aıtyp bergen edi. Prokýror onyń jaýaptaryn oqydy.

“15:00-de mal soıyp, et satatyn orynǵa ákeldim. 19:00 shamasynda Qarjaýbaı “qaýyn ákel” dep habarlasty. Men Sherzatqa “úıge qaıtaıyq” dedim. Ol dúkendi rettep bolǵasyn qaıtatynyn aıtty. Men kólikpen qaıtyp, 21:00-derde shaı-tamaǵymdy iship, uıqyǵa kettim. 23:00-23:30 shamasynda Gúlbaram jeńgem “Qarjaýbaı habarlasyp jatyr” dep telefondy berdi”, – dedi ol.

Sózinshe, Nurymov Sherzat bireýmen tóbelesip qalǵanyn aıtyp, máseleni sheshý úshin shaqyrǵan. Nurǵanat inisine qońyraý shalyp, ne bolǵanyn surapty. Osylaı marqum sol kezde ákesiniń kóligimen dúkenge barady.

“Shapka kıgen Darhan Sherzatpen eregesip turdy. Ne boldy desem, Qarjaýbaıǵa dóreki sóılegen eken. Sherzat “ketpeısiz ba, ákeme nege dóreki sóıleısiz” dedi. Biraq ol Sherzatty sheshesinen tildegen. Sosyn darhanǵa “Ne kerek, qalaı sheshemiz?” dedim. Saý kúıde sóıleseıik dep sabyrǵa shaqyrdym”, – delingen jaýapta.

Málimdeýinshe, Darhan Nurbolǵa habarlasqan. Nurǵanat ony tanıdy eken.

“Nurbol golf kóligimen eki bala bolyp keldi. “Hýtorskıımin, meni tanısyń ba” dedi. “Erteń sóıleseıik, ne kerek” dedim. Nurbol boqtap bastady. “Senderdiki durys emes” dedi”, – delingen Nurǵanat jaýabynda.

Sóıtse Qarjaýbaı men Darhan arasyndaǵy kelispeýshilik Darhannyń jalǵan túbirtek kórsetýinen bastalǵan. Iaǵnı tólem shotqa túspepti. Al darhan Telegram-nan ótirik túbirtek jasatty dep oılaǵan.

“Nurbol agressııa kórsetip, biraq “ózim tóleımin” dep aqysyn tólep tastady. Qol alysyp, bári qaıtady. Qarjaýbaı, Sherzat úsheýmiz dúkenge kirdik. Biraq Nurboldar qaıta keldi”, – dedi ol.

Sózinshe, Nurbol men Nurymov dúkenge kirip, eregesip turǵan. Al Nurǵanat Darhandy basýǵa tyrysty.

“Darhanǵa “Sherzatqa tıme, meni ur” dedim. Ol kelispeı,  “betimdi jyrtyp tastady, murnymdy syndyrdy” dedi. Júrgizýshige “mynalardy alyp qaıt “dedim. Bir kezde Qarjaýbaı “mynanyń qolynda pyshaq bar” dedi. Sóıtsem Nurbolda pyshaq bar eken. Men olarǵa “aqsha bereıik, dastarhan jasap bereıik” dep máseleni sheshkim keldi”, – delingen marqum jaýabynda.

Nurbol “Chıka” (Shyńǵys), Nurqııasty dúkenge shaqyrdy deıdi. Jaman nárse bolaryn sezgen Nurǵanat Sherzatqa úıge qaıtsyn degen.

“Sherzat kólikke minip, ketip qaldy. Nurbol “keshirim suradyń ǵoı, jaraıdy” dep basylǵandaı boldy. Alaıda eki kólik keldi. Chıka menimen amandasty. Túriń tanys qoı desem, “shalmyn” dedi. Dúkenge qaraı keldi de, “delaıte jigitter” dep aıtty. osydan keıin ereges bastaldy”, – dep oqydy prokýror Nurǵanattyń jaýabyn.

Málimdeýinshe, dúken buryshynda Nurqııas Sherzattyń Ahmet degen dosyn urdy. Ol talyp qalǵan. Artynsha Abzal ony kóterip aldy. Nurǵanat “Bala ǵoı, urma” dep, jigitke qashsyn depti.

“Birinshi meni Nurqııas urdy, men onyń ózin urdym. Soqqym kókiregine tıdi. Al Qarjaýbaıdy esikten bir qyz jibermeı turdy. Bir kezde araǵa pyshaq shyqty. Kólikten bir qyz pyshaq alyp shyǵyp, Nurqııasqa ákelip berdi. Pyshaqty kórip, qoryqtym da “qoıaıyq” dedim. Nurqııas maǵan pyshaqty eki ret sermedi. Artynsha maǵan Abzal atyldy. Bir kezde Sherzat atyp shyǵyp, Abzaldy urady. Maǵan 10 shaqty bala jabyldy. Sherzat “qashaıyq” dedi. Men oǵan qashsyn dep aıttym”, – delingen.

Dúkennen 10-15 metr jerde Sherzat otyryp qalyp, «Nurǵanat aǵa, maǵan birdeńe tyǵyp aldy» dep aıqaılaǵan. Ol Sherzatty qushaqtaǵan kezde sol jaq arqasynan jaraqat alǵanyn baıqapty. Jarany alaqanymen japty.

“Jedel járdem shaqyraıyq” dep aıqaıladym. Sherzatty denemmen japtym. Biraq olar meni urdy. Aramyzdy ashqysy keldi. Abzal men Nurqııas maǵan pyshaq suqty. Jambasyma tyqty. Sosyn basymnan tepti. Taǵy bireý urǵan kezde Sherzatty jiberip qaldym. Jeńgem ony denesimen jaýyp jatty. Esimdi jınaǵanymda aýrýhanada boldym”, – delingen jaýapta.

Ol esin jıǵan soń telefony da urlanǵanyn, ámııany joǵalǵanyn baıqapty.

Nurǵanat eshqandaı myltyǵy bolmaǵanyn aıtty. Jaýabynsha, eger myltyq bolsa, Sherzatty qorǵaý úshin olarǵa myltyq atar edi. Nurǵanat Shyńǵystyń qolynan da pyshaq baıqaǵanyn jazdy.

Eske salsaq, Sherzat Polattyń ólimine qatysty sotta kúdikti Darhan Áskentaıdyń synyptasy kýálikberip, kúdiktiden buryn-sońdy burys áreket baıqamaǵanyn aıtty.