جاڭالىقتار
قىزدى قۇتقارىپ, پىشاق جاراقاتىن العان پوليتسەي جول اپاتىنان كوز جۇمدى
فوتو: اشىق دەرەككوز
اباي اۋدانىندا قىستا قىزدى امان الىپ قالىپ, پىشاق جاراقاتىن العان پوليتسەي اپاتتان قازا تاپتى, دەپ حابارلايدى qandastar.kz.
«2024 جىلدىڭ 18 قازانىندا ومبى-مايقاپشاعاي تاس جولىندا ءۇش كولىكتىڭ قاتىسۋىمەن جول-كولىك وقيعاسى بولدى. سوقتىعىس سالدارىنان ءۇش ازامات قازا تاپتى, ونىڭ ىشىندە سەمەي قالاسىنىڭ پوليتسيا اعا سەرجانتى احاتوۆ اسحات بار.
اتالعان فاكتى بويىنشا سوتقا دەيىنگى تەرگەۋ باستالدى. بارلىق ءمان-جايلار انىقتالۋدا. پوليتسيا دەپارتامەنتى قازا بولعانداردىڭ تۋىستارى مەن جاقىندارىنا كوڭىل ايتادى», – دەپ حابارلادى جۇما كۇنى اباي اۋداندىق پوليتسيا دەپارتامەنتىنىڭ (پد) ءباسپاسوز قىزمەتى.
ەستەرىڭىزگە سالا كەتەيىك, 29 اقپان كۇنى پوليتسياعا 13 جاستاعى قىز بەلگىسىز ەر ادامنىڭ اڭدىپ جۇرگەنى تۋرالى ارىزدانعان. قىز قورقىپ, دۇكەننەن شىقپاعانىن ايتقان. قوڭىراۋعا ۋچاسكەلىك پوليتسيا ينسپەكتورلارى جاۋاپ بەردى. كۇدىكتى سۋپەرماركەتتىڭ جانىنان بايقاعان, الايدا جىگىت پوليتسەيلەردى كورگەندە پىشاعىن الىپ, ءتارتىپ ساقشىلارىنا شابۋىل جاساي باستاعان. اۋداندىق پوليتسيا پاترۋلدىك پوليتسيا بريگاداسىن شاقىرۋدى ۇيعارعان.
سول ساتتە مارقۇم پاترۋلدىك پوليتسەي اسحات احاتوۆقا قىلمىسكەر شابۋىل جاساپ, ونى پىشاقتاپ كەتكەن. وسىعان قاراماستان, جارالانعان قىزمەتكەر ارىپتەستەرىمەن بىرگە ۇرىس تاسىلدەرىن قولدانا وتىرىپ, قىلمىسكەردى ۇستاعان بولاتىن.
