«قىزعانىش سەبەپ بولدى»: رۋسلان بەردەنوۆكە قاستاندىق جاساعان كۇدىكتى سوتتا كىناسىن ءىشىنارا مويىندادى

فوتو: parlam.kz

شىمكەنت قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا قالا اكىمىنىڭ ورىنباسارى رۋسلان بەردەنوۆكە قاستاندىق جاساۋ ءىسى بويىنشا سوت پروتسەسى ءوتىپ جاتىر, دەپ جازدى qandastar.kz

ايىپتالۋشى ەرنار جيەمباي كىناسىن ءىشىنارا مويىنداپ, بەردەنوۆتى قورقىتۋ ءۇشىن اڭشى مىلتىعىمەن اتقانىن مالىمدەدى. بۇل تۋرالى Stan.kzاقپارات اگەنتتى حابارلايدى.

سوت وتىرىسى كەزىندە سۋديا ءابىنۇر قاراباەۆ ايىپتالۋشىدان كىناسىن مويىندايتىن-مويىندامايتىنىن سۇرادى.

«كىنامدى مويىندايمىن. ادام ءولتىرۋ نەمەسە دەنساۋلىعىنا زيان كەلتىرۋ نيەتىم بولعان جوق. قورقىتۋ ماقساتىندا ارەكەت ەتكەنىمدى مويىندايمىن. بىراق باپپەن (كىسى ولتىرۋگە وقتالۋ – رەد.) كەلىسپەيمىن», – دەپ جاۋاپ بەردى ەرنار جيەمباي.

ونىڭ ايتۋىنشا, قىلمىسقا بارۋىنا جۇمىستاعى كەلىسپەۋشىلىك ەمەس, قىزعانىش سەبەپ بولعان.

«بۇل ىسىمە وكىنەمىن, وعان قىزعانىش سەبەپ بولدى. بۇل مەنىڭ ار-نامىسىم. جۇمىستىڭ مۇندا ەش قاتىسى جوق», – دەدى ول.

سوتتا جاۋاپ الۋ كەزىندە ەرنار جيەمباي وتباسى تۋرالى ايتىپ, وقيعاعا قاتىستى الەۋمەتتىك جەلىدە تاراعان قاۋەسەتتى جوققا شىعارۋعا تىرىستى.

«التىنشى سىنىپتان بەرى بىرگە وقىدىق – مەنىڭ ادال جارىم, سۇيىكتى جارىم. ەشقاشان ونىڭ بىرەۋمەن ارالاسقانىن كورگەن ەمەسپىن. الەۋمەتتىك جەلىدە جازعانداي, جاقسى وتباسىنان شىققان تاربيەلى قىز, مۇلدەم وڭاي ەمەس», — دەيدى سوتتالۋشى.

وعان قىلمىستىق كودەكستىڭ 99-بابىنىڭ 1-بولىگى جانە 24-بابىنىڭ 3-بولىگى بويىنشا (ادام ولتىرۋگە وقتالۋ) ايىپ تاعىلعان.

سوت مەملەكەتتىك تىلدە ءوتىپ جاتىر. جابىرلەنۋشى رۋسلان بەردەنوۆ سوتقا قاتىسقان جوق. وكىلى جەڭىس تىنىبەكتىڭ ايتۋىنشا, رۋسلان بەردەنوۆ ەمدەلىپ جاتۋىنا بايلانىستى سوتقا قاتىسپاعان.

ەسكە سالساق, بۇعان دەيىن رۋسلان بەردەنوۆكە شابۋىل جاساعانكۇدىكتىنىڭ وق اتۋىنا نە سەبەپ بولعانىنجازعان ەدىك. كۇدىكتى ەرنار جيەمباي – اكىمدىككە قاراستى «تۇرعىن ءۇي شىمكەنت» جشس-ءنىڭ بۇرىنعى ديرەكتورى, ەكى بالانىڭ اكەسى. ايىپتاۋ اكتىسىنە سايكەس, سول كۇنى ول اكىم ورىنباسارىنىڭ نۇسقاۋىمەن قىزمەتىنەن بوساتىلعان. تەرگەۋ نۇسقاسى بويىنشا, ءدال وسى جاعداي ونى قىلمىس جاساۋعا يتەرمەلەگەن.

ايتا كەتەيىك, شىمكەنت قالاسى اكىمىنىڭ ورىنباسارى رۋسلان بەردەنوۆكە 21 ساۋىردە اكىمدىك عيماراتىنىڭ الدىندا قاستاندىق جاسالدى. ول جامباس جانە يىق تۇسىنان وق جاراقاتىن الىپ, اۋرۋحاناعا جەتكىزىلىپ, شۇعىل تۇردە وتا جاسالدى. شابۋىلدىڭ الدىن الا سەبەبى رەتىندە بىرنەشە نۇسقا ايتىلدى.