جاڭالىقتار
قىزمەت بابىندا قازا تاپقان اسكەري قىزمەتشىلەرگە قانشا اقشا تولەنەتىنى بەلگىلى بولدى
فوتو: freepik.kz
جۇمىس بابىندا قازا تاپقان اسكەري قىزمەتكەرلەردى جەرلەۋگە بولىنەتىن قارجى كولەمى بەلگىلى بولدى, دەپ حابارلايدى qandastar.kz
قورعانىس مينيسترلىگى قىزمەت بارىسىندا قازا تاپقان اسكەري قىزمەتكەردىڭ ءمايىتىن تاسىمالداۋ مەن جەرلەۋگە 314 560 تەڭگە كولەمىندە قاراجات بولەتىنىن مالىمدەدى. بۇل تۋرالى «اشىق نقا» پورتالىندا جاريالانعان مينيسترلىكتىڭ قاۋلىسىندا كورسەتىلگەن.
اتالعان سوما مارقۇمنىڭ دەنەسىن تۋعان جەرىنە جەتكىزۋگە, جەرلەۋ ءراسىمىن ۇيىمداستىرۋعا جانە قۇلپىتاس ورناتۋعا جۇمسالادى.
«اسكەري بورىشىن وتەۋ كەزىندە قازا تاپقان نەمەسە قىزمەتتىك مىندەتتەرىن ورىنداۋ بارىسىندا العان جاراقاتىنان, كونتۋزيادان نەمەسە اۋىر سىرقاتتان قايتىس بولعان اسكەري قىزمەتشىلەردىڭ ءمايىتىن تاسىمالداۋ, ونى جەرلەۋ, قۇلپىتاس جاساۋ جانە ورناتۋ شىعىندارى ايلىق ەسەپتىك كورسەتكىشتىڭ (اەك) 80 ەسەلەنگەن مولشەرى رەتىندە بەلگىلەنسىن», – دەلىنگەن قۇجاتتا.
Dalanews.kz جازعانداي, قۇجاتقا ەنگىزىلگەن وزگەرىستەر ارتىق انىقتامالاردى الىپ تاستاۋ ماقساتىندا جاسالعان. بۇعان دەيىنگى رەداكتسيادا «اسكەري جيىندارعا شاقىرىلعان اسكەري مىندەتتىلەر» دەگەن تىركەس بولعان, جاڭا قۇجاتتا بۇل سوزدەر الىپ تاستالعان.
اسكەردەگى ءولىم-ءجىتىم ماسەلەسى
قازاقستاندا اسكەري قىزمەتكەرلەر اراسىندا سۋيتسيد وقيعالارى ءجيى تىركەلەدى. 2024 جىلى اسكەردە بىرنەشە ءوز-وزىنە قول جۇمساۋ دەرەكتەرى ورىن الدى. الايدا قورعانىس ءمينيسترىنىڭ ورىنباسارى شايح-حاسان جازىقباەۆ بۇل جاعدايدىڭ كوبەيگەنىن جوققا شىعارادى. ونىڭ ايتۋىنشا, 2024 جىلى مەرزىمدى اسكەري بورىشىن وتەپ جۇرگەندەر اراسىندا ءۇش سۋيتسيد قانا تىركەلگەن, ال كەلىسىمشارت بويىنشا قىزمەت اتقارعان اسكەري قىزمەتكەرلەر اراسىنداعى ءوز-وزىنە قول جۇمساۋ جاعدايلارى تۇرمىستىق قيىندىقتارمەن بايلانىستى.
دەپۋتات كونستانتين اۆەرشين اسكەريلەر اراسىندا قۇمار ويىنعا تاۋەلدىلىك (لۋدومانيا) ارتىپ بارا جاتقانىن ايتىپ, كوپتەگەن ساربازداردىڭ ويىنقۇمارلىق كەسىرىنەن ءوز-وزىنە قول جۇمسايتىنىن العا تارتتى.
