Qyzmet babynda qaza tapqan áskerı qyzmetshilerge qansha aqsha tólenetini belgili boldy

Foto: freepik.kz

Jumys babynda qaza tapqan áskerı qyzmetkerlerdi jerleýge bólinetin qarjy kólemi belgili boldy, dep habarlaıdy qandastar.kz

Qorǵanys mınıstrligi qyzmet barysynda qaza tapqan áskerı qyzmetkerdiń máıitin tasymaldaý men jerleýge 314 560 teńge kóleminde qarajat bóletinin málimdedi. Bul týraly «Ashyq NQA» portalynda jarııalanǵan mınıstrliktiń qaýlysynda kórsetilgen.

Atalǵan soma marqumnyń denesin týǵan jerine jetkizýge, jerleý rásimin uıymdastyrýǵa jáne qulpytas ornatýǵa jumsalady.

«Áskerı boryshyn óteý kezinde qaza tapqan nemese qyzmettik mindetterin oryndaý barysynda alǵan jaraqatynan, kontýzııadan nemese aýyr syrqattan qaıtys bolǵan áskerı qyzmetshilerdiń máıitin tasymaldaý, ony jerleý, qulpytas jasaý jáne ornatý shyǵyndary aılyq eseptik kórsetkishtiń (AEK) 80 eselengen mólsheri retinde belgilensin», – delingen qujatta.

Dalanews.kz jazǵandaı, qujatqa engizilgen ózgerister artyq anyqtamalardy alyp tastaý maqsatynda jasalǵan. Buǵan deıingi redakııada «áskerı jıyndarǵa shaqyrylǵan áskerı mindettiler» degen tirkes bolǵan, jańa qujatta bul sózder alyp tastalǵan.

Áskerdegi ólim-jitim máselesi

Qazaqstanda áskerı qyzmetkerler arasynda sýııd oqıǵalary jıi tirkeledi. 2024 jyly áskerde birneshe óz-ózine qol jumsaý derekteri oryn aldy. Alaıda Qorǵanys mınıstriniń orynbasary Shaıh-Hasan Jazyqbaev bul jaǵdaıdyń kóbeıgenin joqqa shyǵarady. Onyń aıtýynsha, 2024 jyly merzimdi áskerı boryshyn ótep júrgender arasynda úsh sýııd qana tirkelgen, al kelisimshart boıynsha qyzmet atqarǵan áskerı qyzmetkerler arasyndaǵy óz-ózine qol jumsaý jaǵdaılary turmystyq qıyndyqtarmen baılanysty.

Depýtat Konstantın Avershın áskerıler arasynda qumar oıynǵa táýeldilik (lýdomanııa) artyp bara jatqanyn aıtyp, kóptegen sarbazdardyń oıynqumarlyq kesirinen óz-ózine qol jumsaıtynyn alǵa tartty.