«قىزمەتىنە قاراپ باعالايىق»: سپورت ءمينيسترى باس باپكەر چەرچەسوۆتىڭ «ازىلىنە» قاتىستى پىكىر ءبىلدىردى

كوللاج Stan.kz

تۋريزم جانە سپورت ءمينيسترى ەربول مىرزابوسىنوۆ فۋتبولدان قازاقستان قۇراماسىنىڭ باس باپكەرى ستانيسلاۆ چەرچەسوۆتىڭ قازاق تىلىندە سۇراق قويعان ءجۋرناليستى كەلەمەجدەۋىنە قاتىستى پىكىر ءبىلدىردى. بۇل تۋرالى qandastar.kz   Stan.kz اقپارات اگەنتتىگىنە سىلتەمە جاساپ حابارلايدى.

مينيستر ءوز پىكىرىن الەۋمەتتىك جەلىدە پاراقشاسىندا جاريالادى.

“ارينە, ستانيسلاۆ چەرچەسوۆتىڭ «فرانتسۋز تىلىنە» قاتىستى قالجىڭى ورىنسىز بولدى. مۇنى قازاقستان فۋتبول فەدەراتسياسى دا, باپكەردىڭ ءوزى دە بەك تۇسىنەدى. دەگەنمەن, چەرچەسوۆتىڭ باستى مىندەتى – ۇلتتىق قۇرامانى جاڭا دەڭگەيگە شىعارۋ. ەندەشە, وعان ەڭ الدىمەن كاسىبي قىزمەتىنە قاراپ باعا بەرۋگە شاقىرامىن”, – دەپ جازدى مينيستر.

مينيستر قازاق حالقىنىڭ قوناقجاي, دارحان مىنەزدى, كەشىرىمدى ەل ەكەنىن اتاپ ءوتتى.

ء“بىزدى مىقتى ەل ەتەتىن دە وسى قاسيەتتەر. سوندىقتان ماسەلەنى ودان ءارى ورشىتە بەرمەي, حالقىمىزعا ءتان كەڭپەيىلدىك تانىتقانىمىز ابزال. كەز كەلگەن داۋلى ماسەلەنى اقىل-پاراساتپەن شەشەتىن تولەرانتتى, وركەنيەتتى, ياعني دانا قوعام ەكەنىمىزدى كورسەتە بىلەيىك”, – دەيدى ەربول مىرزابوسىنوۆ.

سونداي-اق مينيستر ستانيسلاۆ چەرچەسوۆتىڭ حالىقارالىق دەڭگەيدەگى تانىمال فۋتبوليست ءارى 20 جىلدىق تاجىريبەسى بار كاسىبي جاتتىقتىرۋشى ەكەنىن اتاپ ءوتتى.

“ول تۇبىندە قازاقستاندىق جانكۇيەرلەردىڭ سەنىمىن اقتاپ, ۇلتتىق قۇرامانى قازىرگى كۇردەلى كەزەڭنەن ابىرويمەن الىپ شىعادى دەپ سەنەمىن”, – دەلىنگەن جازبادا.

ەسكە سالساق, بۇعان دەيىن فۋتبولدان قازاقستان ۇلتتىق قۇراماسىنىڭ باس باپكەرى ستانيسلاۆ چەرچەسوۆ قازاق تىلىندە سۇراق قويعان ءتىلشىنى «سەن فرانتسۋز ءتىلىندى سويلەپ تۇرسىڭ با?» دەپ كەلەمەجدەگەنى تۋرالى جازعان ەدىك. وسى ارەكەتى ءۇشىن ستانيسلاۆ چەرچەسوۆكە 738 مىڭ تەڭگە ايىپپۇل سالىندى.