قىزىل كىتاپتاعى قىزعالداقپەن سۋرەتكە تۇسكەن اكىم قىسىمعا ۇشىراعانىن ايتتى

فوتو: ۆيدەودان كادر

اقتوبە وبلىسىندا قۇدايبەرگەن جۇبانوۆ اتىنداعى اۋىلدىق وكرۋگتىڭ اكىمى ءلاززات بەردىباەۆا سوتقا تارتىلدى, دەپ حابارلايدى qandastar.kz

كتك تەلەارناسىنىڭ مالىمەتىنشە, بەردىباەۆا سۋرەتتە بەينەلەنگەن گۇلدەردى ونىڭ كامەلەتكە تولماعان قىزدارى كاندىاگاش ماڭىندا دەمالىس كەزىندە ءوز بەتتەرىنشە تەرىپ العان. ايتۋىنشا, ولار گۇلدەر وسكەن جەردە ەسكەرتۋ بەلگىلەرى بولماعان, جانىندا مال جايىلىپ جۇرگەن.

الايدا اكىمگە «اتا-انالىق مىندەتىن دۇرىس اتقارماعانى» ءۇشىن اكىمشىلىك ءىس قوزعالدى. بۇل قۇقىقبۇزۋشىلىق ءۇشىن 70 اەك كولەمىندە (275 240 تەڭگە) ايىپپۇل قاراستىرىلعان.

سوت وتىرىسىندا قىزعالداقتاردىڭ قىزىل كىتاپقا ەنگەن-ەنبەگەنى ناقتىلانعان جوق. ماماندار بۋكەت ساقتالماعاندىقتان, ناقتى ساراپتاما جۇرگىزە الماعان. الايدا وڭىردە سيرەك كەزدەسەتىن شرەنك جانە كاۋفمان تۇرىندەگى قىزعالداقتار وسەتىنىن راستادى.

«فوتوسۋرەت بويىنشا گۇل ءتۇرىن انىقتاۋ مۇمكىن ەمەس. مۇعالجار اۋدانىندا ناقتى قاي ءتۇرى وسەتىنى تۋرالى دەرەك تە جوق», — دەدى وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باس مامانى ارتۋر كانتارباەۆ.
ءلاززات بەردىباەۆا بۇل جاعدايدىڭ ءوزىن جانە وتباسىن كۇيزەلىسكە ۇشىراتقانىن ايتتى.

«مەن دەپرەسسياعا ءتۇستىم. قوعامدىق قىسىم ماعان دا, قىزدارىما دا اۋىر ءتيدى. ءتىپتى ولاردىڭ جەكە ءومىرىن دە تالقىلاپ جاتتى. مەن ءوز مىندەتتەرىمدى قالاي اتقارىپ جۇرگەنىمدى حالىق بىلەدى», — دەپ كوزىنە جاس الدى اكىم.

سوتقا ول ەكى مىنەزدەمە ۇسىندى: بىرەۋى مەكتەپ ديرەكتورىنان قىزدارىنا بەرىلگەن, ەكىنشىسى — اۋىل اقساقالدارىنان ءوز اتىنا. ەكەۋى دە جاعىمدى سيپاتتا.

سوت وتىرىسى بارىسىندا اكىمنىڭ كىناسى دالەلدەنبەدى, سەبەبى بۋكەت تە, ناقتى ساراپتاما دا جوق. ءىس بويىنشا كەلەسى تىڭداۋ 15 مامىرعا بەلگىلەنگەن.