جاڭالىقتار
قىزىلوردا قالاسىن ىستىق سۋمەن قامتاماسىز ەتۋ ءۇشىن ۇكىمەت رەزەرۆىنەن 5 ملرد تەڭگە ءبولىندى
فوتو: اشىق دەرەككوز
مەملەكەت باسشىسىنىڭ تاپسىرمالارىن جۇزەگە اسىرۋ اياسىندا قىزىلوردا وبلىسىنىڭ بيۋدجەتىنە ىستىق سۋمەن جابدىقتاۋ جەلىلەرىن سالۋ ءۇشىن ۇكىمەت رەزەرۆىنەن نىسانالى ترانسفەرتتەر تۇرىندە شامامەن 5 ملرد تەڭگە ءبولىندى, دەپ جازدى qandastar.kz
ءتيىستى قاۋلىعا پرەمەر-مينيستر ولجاس بەكتەنوۆ قول قويدى.
بۇگىندە قىزىلوردا قالاسى – ورتالىقتاندىرىلعان ىستىق سۋمەن جابدىقتاۋ جۇيەسى جوق رەسپۋبليكاداعى جالعىز وبلىس ورتالىعى.
قالاداعى كوپقاباتتى ۇيلەر ەلەكتر نەمەسە گازبەن جىلىتۋ قۇرىلعىلارى ارقىلى ىستىق سۋمەن قامتاماسىز ەتىلەدى. بۇل ءوز كەزەگىندە توتەنشە جاعدايلارعا اكەلۋى مۇمكىن.
مەملەكەت باسشىسى قاسىم-جومارت توقاەۆ 2023 جىلعى 10 قازاندا وڭىرگە جاساعان جۇمىس ساپارى بارىسىندا قالانى 2025 جىلدىڭ سوڭىنا دەيىن ورتالىقتاندىرىلعان ىستىق سۋمەن جابدىقتاۋ جۇيەسىمەن قامتاماسىز ەتۋ ماسەلەسىن شەشۋدى تاپسىرعان بولاتىن.
جالپى قۇنى 26,2 ملرد تەڭگەنى قۇرايتىن ءتيىستى جوبانى ەكى كەزەڭ بويىنشا جۇزەگە اسىرۋ جوسپارلانعان. ءبىرىنشى كەزەڭدە – 2024 جىلى 187 تۇرعىن ءۇيدى سۋ جۇيەسىمەن قامتۋ جۇمىستارى باستالسا, ەكىنشى كەزەڭدە – بيىل 236 تۇرعىن ءۇي سۋ جۇيەسىنە قوسىلادى. 2024 جىلى ءبىرىنشى كەزەڭگە ۇكىمەت رەزەرۆىنەن 11 ملرد تەڭگەدەن استام قاراجات باعىتتالدى. اتالعان قاۋلى نەگىزىندە ۇكىمەت رەزەرۆىنەن بولىنگەن 5 ملرد تەڭگە بيىل ەكىنشى كەزەڭنىڭ ءبىرىنشى كەزەكتەگى جۇمىستارى ءۇشىن پايدالانىلادى.
وسىلايشا, جوبانى جۇزەگە اسىرۋ ناتيجەسىندە قىزىلوردا قالاسىنىڭ 423 كوپ قاباتتى تۇرعىن ءۇيى ورتالىقتاندىرىلعان ىستىق سۋمەن جابدىقتاۋ جۇيەسىنە قوسىلادى.
