قىزىلوردا وبلىسى كاسىپكەرلىك جانە ونەركاسىپ باسقارماسىنىڭ باسشىسى سوتتالدى

فوتو: اشىق دەرەككوز

قىزىلوردا قالالىق سوتى وبلىستىق كاسىپكەرلىك جانە ونەركاسىپ باسقارماسىنىڭ باسشىسى د.ابساتتاروۆقا قاتىستى ۇكىم شىعاردى, دەپ حابارلايدى Qandastar.kz.

ول بيزنەس وكىلدەرىنە ۇلىنىڭ وقۋىنا 1,4 ملن تەڭگە سوماسىندا اقى تولەۋ جانە قۇنى 6,8 ملن تەڭگە ديزەل وتىنىن بەرۋ قاجەتتىگى تۋرالى زاڭسىز نۇسقاۋلار بەرۋ ارقىلى لاۋازىمدىق وكىلەتتىكتەرىن اسىرا پايدالانعانى ءۇشىن كىنالى دەپ تانىلدى.

بۇدان باسقا, شەنەۋنىك ءوڭىر كاسىپورىندارىنىڭ سۇيىتىلعان گازدىڭ ءتيىستى كولەمىن الۋ قۇقىعىن شەكتەۋ ارقىلى بيزنەس سۋبەكتىلەرىنە 26,9 ملن تەڭگە سوماسىندا زالال كەلتىرە وتىرا زاڭدى كاسىپكەرلىك قىزمەتپەن اينالىسۋعا كەدەرگى جاساعانى ءۇشىن سوتتالدى.

سوت ۇكىمىمەن ابساتتاروۆقا مەملەكەتتىك قىزمەتتە جانە كۆازيمەملەكەتتىك سەكتور سۋبەكتىلەرىندە لاۋازىمداردى اتقارۋ قۇقىعىنان ءومىر بويىنا ايىرا وتىرىپ, 9 اي باس بوستاندىعىنان ايىرۋ تۇرىندەگى جازا تاعايىندالدى, سونداي – اق مەملەكەتتىك ناگرادا – «ەرەن ەڭبەگى ءۇشىن» مەدالىنەن ايىرۋ تۋرالى ۇسىنىس ەنگىزىلدى, – دەلىنگەن حابارلامادا.

ۇكىم زاڭدى كۇشىنە ەندى.