قىزىلوردا وبلىسىندا اليمەنتتەن جالتارعاندار قۇمار ويىندارعا 250 ملن تەڭگە جۇمساعان

فوتو: اشىق دەرەككوز

قىزىلوردا وبلىسىندا اليمەنتتەن جالتارعاندار قۇمار ويىندارعا 250 ملن تەڭگە جۇمساعان, دەپ حابارلايدى Halyq Uni.

وبلىستىق پروكۋراتۋرا وسى جىلدىڭ 6 ايىندا اليمەنت ءوندىرۋ باعىتىندا ادىلەت دەپارتامەنتىنە جانە جەكە سوت ورىنداۋشىلارىنىڭ وڭىرلىك پالاتاسىنا زاڭدىلىقتىڭ بۇزىلۋىن جويۋ تۋرالى 12 ۇسىنۋ ەنگىزدى.

ناتيجەسىندە 155 جالعىز باستى انانىڭ پايداسىنا 91 ملن تەڭگە اليمەنت ءوندىرىلدى. سونداي-اق اليمەنت تولەۋدەن جالتارىپ جۇرگەن 147 بورىشكەر اكىمشىلىك قاماققا الۋ جانە ايىپپۇل سالۋ تۇرىندەگى جازاعا تارتىلدى. مىندەتتەرىن تيىسىنشە ورىنداماعانى ءۇشىن 39 جەكە سوت ورىنداۋشى تارتىپتىك جاۋاپكەرشىلىككە تارتىلدى.

پروكۋراتۋرانىڭ باستاماسىمەن اليمەنت تولەۋدەن جالتارىپ جۇرگەن 18 بورىشكەرگە قاتىستى قك-ءتىڭ 139-بابىمەن قىلمىستىق ءىس تىركەلىپ, ونىڭ 12-ءى قىلمىستىق جاۋاپتىلىققا تارتىلدى. 9 بورىشكەر سوت ۇكىمىمەن باس بوستاندىعىن شەكتەۋ جازاسىنا سوتتالسا, 3 ءىس بويىنشا تەرگەۋ جالعاسىپ جاتىر, – دەلىنگەن پروكۋراتۋرا حابارلاماسىندا.

سونىمەن قاتار وبلىس پروكۋراتۋراسى قۇمار ويىندارعا 250 ملن تەڭگەدەن استام قاراجات جۇمساعان 154 بورىشكەردى انىقتادى. بورىشكەرلەر اليمەنت تولەۋ جونىندەگى مىندەتتەمەلەرىن ەلەمەي, نەمقۇرايلىلىق تانىتىپ, بۋكمەكەرلىك كەڭسەلەردە قۇمار ويىندار ويناعان.

ماسەلەن, اليمەنت بويىنشا 1 ميلليون تەڭگە قارىزى قالىپتاسقان تۇرعىن ءوزىنىڭ شوتىن 156 ميلليون تەڭگەدەن استام سوماعا تولىقتىرعان.