Qyzylorda oblysynda alımentten jaltarǵandar qumar oıyndarǵa 250 mln teńge jumsaǵan

Foto: ashyq derekkóz

Qyzylorda oblysynda alımentten jaltarǵandar qumar oıyndarǵa 250 mln teńge jumsaǵan, dep habarlaıdy Halyq Uni.

Oblystyq prokýratýra osy jyldyń 6 aıynda alıment óndirý baǵytynda Ádilet departamentine jáne Jeke sot oryndaýshylarynyń óńirlik palatasyna zańdylyqtyń buzylýyn joıý týraly 12 usyný engizdi.

Nátıjesinde 155 jalǵyz basty ananyń paıdasyna 91 mln teńge alıment óndirildi. Sondaı-aq alıment tóleýden jaltaryp júrgen 147 boryshker ákimshilik qamaqqa alý jáne aıyppul salý túrindegi jazaǵa tartyldy. Mindetterin tıisinshe oryndamaǵany úshin 39 jeke sot oryndaýshy tártiptik jaýapkershilikke tartyldy.

Prokýratýranyń bastamasymen alıment tóleýden jaltaryp júrgen 18 boryshkerge qatysty QK-tiń 139-babymen qylmystyq is tirkelip, onyń 12-i qylmystyq jaýaptylyqqa tartyldy. 9 boryshker sot úkimimen bas bostandyǵyn shekteý jazasyna sottalsa, 3 is boıynsha tergeý jalǵasyp jatyr, – delingen prokýratýra habarlamasynda.

Sonymen qatar oblys prokýratýrasy qumar oıyndarǵa 250 mln teńgeden astam qarajat jumsaǵan 154 boryshkerdi anyqtady. Boryshkerler alıment tóleý jónindegi mindettemelerin elemeı, nemquraılylyq tanytyp, býkmekerlik keńselerde qumar oıyndar oınaǵan.

Máselen, alıment boıynsha 1 mıllıon teńge qaryzy qalyptasqan turǵyn óziniń shotyn 156 mıllıon teńgeden astam somaǵa tolyqtyrǵan.