قىزىلوردا وبلىسىندا كوپبالالى اكە مەن دەپۋتات اراسىنداعى جەر داۋى سوتقا جەتتى

فوتو:سكرين

قىزىلوردا وبلىسى جاڭاقورعان اۋدانىندا كوپبالالى اكە ىسقاق زاتتيلاەۆ وزىنە تيەسىلى جەر تەلىمىن اۋداندىق ءماسليحات دەپۋتاتىنا ۋاقىتشا بەرگەن. بىراق كەلىسىلگەن مەرزىم اياقتالعان سوڭ, دەپۋتات بۇل جەردى قايتارۋدان باس تارتقان. بۇل تۋرالى qandastar.kz ينفورمبيۋرو باعدارلاماسىنا سىلتەمە جاساپ حابارلايدى.

ىسقاق زاتتيلاەۆتىڭ ايتۋىنشا, ول 2018 جىلى 75 گەكتار جەردى دەپۋتاتقا ءۇش جىلعا ۋاقىتشا پايدالانۋعا بەرگەن. ەكى تاراپ بۇل كەلىسىمدى قۇجات جۇزىندە راسىمدەگەن. دەپۋتات بۇل جەردى «تۇقىم شارۋاشىلىعىن اشامىن» دەپ سۇراعان. الايدا كەلىسىم مەرزىمى بىتكەننەن كەيىن, ول جەردى قايتارماي, ءوزى يەلەنىپ العان. كوپبالالى اكە وسى جەرگە كۇرىش ەگىپ, جەتى بالاسىن اسىراپ وتىرعانىن ايتادى.

بۇل جاعداي ۋشىعىپ, سوتقا دەيىن جەتكەن. اۋداندىق سوت زاتتيلاەۆتىڭ پايداسىنا شەشىم شىعارىپ, جەردى قايتارۋ تۋرالى ۇكىم ەتكەن. بىراق دەپۋتات بۇل شەشىممەن كەلىسپەي, اپپەلياتسيالىق سوتقا شاعىم تۇسىرگەن.

قازىر ءىس اپپەلياتسيالىق سوتتا قارالىپ جاتىر. ءتۇسىرىلىم توبى سوت وتىرىسىنا قاتىسپاق بولعانىمەن, دەپۋتات پەن ونىڭ زاڭگەرلەرى قارسى بولىپ, سۋديا تۇسىرىلىمگە رۇقسات بەرمەگەن. دەپۋتات تىلشىلەرگە پىكىر بىلدىرۋدەن دە باس تارتتى, بىراق سىرت كوزدەن زاڭ اياسىندا ارەكەت ەتىپ جاتقانىن ايتقان.

ال اكىمدىك وكىلى سەرىك سەيدۋاليەۆ بۇل داۋعا ارالاسا المايتىنىن مالىمدەدى.

«اكىمدىك تاراپىنان جۇرگىزىلگەن قاۋلىلار نەمەسە شارتتارعا بايلانىستى ەشقانداي داۋ ايتىلىپ تۇرعان جوق بۇل جەردە. ءبىر-بىرىمەن كەلىسپەي وتىر. كەلىسكەن جاعدايدا ءىشىنارا قايتا راسىمدەۋگە تولىق مۇمكىندىكتەرى بار. كەلىسپەگەندىكتەن قازىر سوت ارقىلى شەشىلىپ جاتىر», – دەدى جاڭاقورعان اۋداندىق اۋىل شارۋاشىلىعى جانە جەر قاتىناستارى ءبولىمى باسشىسىنىڭ ورىنباسارى.

كوپبالالى اكە اپپەلياتسيالىق سوت ءىستى ۇزاققا سوزىپ جاتىر دەپ الاڭداۋلى. ول دەپۋتاتتىڭ ىقپالى بار دەپ كۇدىكتەنەدى. دەگەنمەن, وتباسىنىڭ جالعىز كۇنكورىس كوزى بولعان جەردى قايتارۋ ءۇشىن سوڭىنا دەيىن كۇرەسەتىنىن ايتتى.

ەسكە سالايىق, بۇعان دەيىن قىزىلوردا وبلىسى قارماقشى اۋدانىندا جەر داۋى ۋشىعىپ كەتكەنىن جازعان ەدىك. جۇزدەگەن تۇرعىن كۇرىش ەگۋمەن اينالىساتىن قوجالىقتاعى جەر ۇلەستەرىن الا الماي ءجۇر. ايتۋلارىنشا, شارۋاشىلىقتىڭ توراعاسى تۇسكەن پايدانى نە حالىقپەن بولىسپەيدى, نە اۋىلعا جاعداي جاسامايدى. جەرگە ءونىم ەككەن حالىق اۋدان اكىمى بىزگە كەدەرگى كەلتىرىپ وتىر دەيدى.