Qyzylorda oblysynda kópbalaly áke men depýtat arasyndaǵy jer daýy sotqa jetti

Foto:skrın

Qyzylorda oblysy Jańaqorǵan aýdanynda kópbalaly áke Ysqaq Zattılaev ózine tıesili jer telimin aýdandyq máslıhat depýtatyna ýaqytsha bergen. Biraq kelisilgen merzim aıaqtalǵan soń, depýtat bul jerdi qaıtarýdan bas tartqan. Bul týraly qandastar.kz Informbıýro baǵdarlamasyna silteme jasap habarlaıdy.

Ysqaq Zattılaevtyń aıtýynsha, ol 2018 jyly 75 gektar jerdi depýtatqa úsh jylǵa ýaqytsha paıdalanýǵa bergen. Eki tarap bul kelisimdi qujat júzinde rásimdegen. Depýtat bul jerdi «tuqym sharýashylyǵyn ashamyn» dep suraǵan. Alaıda kelisim merzimi bitkennen keıin, ol jerdi qaıtarmaı, ózi ıelenip alǵan. Kópbalaly áke osy jerge kúrish egip, jeti balasyn asyrap otyrǵanyn aıtady.

Bul jaǵdaı ýshyǵyp, sotqa deıin jetken. Aýdandyq sot Zattılaevtyń paıdasyna sheshim shyǵaryp, jerdi qaıtarý týraly úkim etken. Biraq depýtat bul sheshimmen kelispeı, appelıaııalyq sotqa shaǵym túsirgen.

Qazir is appelıaııalyq sotta qaralyp jatyr. Túsirilim toby sot otyrysyna qatyspaq bolǵanymen, depýtat pen onyń zańgerleri qarsy bolyp, sýdıa túsirilimge ruqsat bermegen. Depýtat tilshilerge pikir bildirýden de bas tartty, biraq syrt kózden zań aıasynda áreket etip jatqanyn aıtqan.

Al ákimdik ókili Serik Seıdýalıev bul daýǵa aralasa almaıtynyn málimdedi.

«Ákimdik tarapynan júrgizilgen qaýlylar nemese sharttarǵa baılanysty eshqandaı daý aıtylyp turǵan joq bul jerde. Bir-birimen kelispeı otyr. Kelisken jaǵdaıda ishinara qaıta rásimdeýge tolyq múmkindikteri bar. Kelispegendikten qazir sot arqyly sheshilip jatyr», – dedi Jańaqorǵan aýdandyq aýyl sharýashylyǵy jáne jer qatynastary bólimi basshysynyń orynbasary.

Kópbalaly áke appelıaııalyq sot isti uzaqqa sozyp jatyr dep alańdaýly. Ol depýtattyń yqpaly bar dep kúdiktenedi. Degenmen, otbasynyń jalǵyz kúnkóris kózi bolǵan jerdi qaıtarý úshin sońyna deıin kúresetinin aıtty.

Eske salaıyq, buǵan deıin Qyzylorda oblysy Qarmaqshy aýdanynda jer daýy ýshyǵyp ketkenin jazǵan edik. Júzdegen turǵyn kúrish egýmen aınalysatyn qojalyqtaǵy jer úlesterin ala almaı júr. Aıtýlarynsha, sharýashylyqtyń tóraǵasy túsken paıdany ne halyqpen bólispeıdi, ne aýylǵa jaǵdaı jasamaıdy. Jerge ónim ekken halyq aýdan ákimi bizge kedergi keltirip otyr deıdi.