قىزىلوردا وبلىسىندا سوعىس ارداگەرى ومىردەن ءوتتى

قىزىلوردا وبلىسىندا ۇلى وتان سوعىسىنىڭ ارداگەرلەرى تىلەۋبەرگەن توبابەرگەن ۇلى قايتىس بولدى, دەپ حابارلايدى Qandastar.kz اقپاراتتىق پورتالى قازالى اۋدانىنىڭ اكىمدىگىنە سىلتەمە جاساپ. 

ول 1924 جىلى قازالى اۋدانىنىڭ جامبىل كولحوزىندا دۇنيەگە كەلگەن. 1942 جىلى وتان الدىنداعى بورىشىن وتەۋگە شاقىرىلىپ, تاشكەنت قالاسىندا اسكەري دايىندىقتان وتەدى. ماسكەۋ ىرگەسىندەگى سمولەنسك قالاسىنا اسكەري ەشەلونمەن كەلىپ, 150-زەڭبىرەكتى اتقىشتار پولكى قاتارىندا مايدان دالاسىنداعى ۇرىستارعا قاتىسقان. ءبىر جىلدان كەيىن 291-اتقىشتار پولكى قۇرامىنا جىبەرىلىپ, بەلورۋسسيا, پولشا, چەحوسلوۆاكيا, كينيگسبەرگ, كالينينگراد قالالارىن جاۋدان ازات ەتۋگە اتسالىستى. مارشال گ.جۋكوۆ باسشىلىق ەتەتىن 158-گۆارديالىق پولكتىڭ 28-اۆتومات روتاسى ساپىندا بولىپ, بىرنەشە رەت باتىلدىعىمەن كوزگە تۇسكەن.

قاتارداعى جاۋىنگەر 1945 جىلدىڭ 9 مامىرىندا بەرلين قالاسىندا جەڭىس كۇنىن قارسى الىپ, سوعىستان كەيىن نەمىس-فاشيست باسقىنشىلارىنىڭ تۇتقىنعا الىنعان جاۋىنگەرلەرىن كۇزەتۋگە قالدىرىلادى. تۋعان جەرگە 1947 جىلى عانا ورالىپ, زەينەت جاسىنا دەيىن تەمىرجول سالاسىندا ابىرويلى ەڭبەك ەتتى.

تىلەۋبەرگەن توبابەرگەن ۇلى ءى دارەجەلى «وتان سوعىسى» وردەنىمەن, «بەرليندى ازات ەتكەنى ءۇشىن», 1941-1945 جىلدارداعى « ۇلى وتان سوعىسىندا گەرمانيانى جەڭگەنى ءۇشىن», «جۋكوۆ» مەدالىمەن, «بەلارۋسسيانىڭ نەمىس-فاشيست باسقىنشىلارىنان ازات ەتىلگەنىنە 60 جىل», « ۇلى وتان سوعىسىنداعى قاجىرلى ەڭبەگى ءۇشىن», «سسسر قارۋلى كۇشتەرىنە 70 جىل» جانە ۇلى جەڭىستىڭ 20, 25, 30, 40, 50, 60, 65 جىلدىعى, «ەڭبەك ارداگەرى», «استاناعا 10 جىل» مەدالدارىمەن ماراپاتتالعان. «قازالى اۋدانىنىڭ قۇرمەتتى ازاماتى».