جاڭالىقتار
قىزىلوردادا 150 وتباسى باسپانالى بولدى
60 جانە 90 پاتەرلى كوپقاباتتى ۇيلەرگە مۇمكىندىگى شەكتەۋلى ازاماتتار, تولىق ەمەس وتباسىلار مەن جەتىم جانە اتا-انا قامقورلىعىنسىز قالعان بالالار قونىستانادى,
بۇگىن ەرەكشە قۋانىشقا كەنەلگەندەردىڭ ءبىرى – روزا اكىمتاەۆا. جالعىزباستى انا 17 جىلدان بەرى پاتەر كەزەگىندە تۇرىپ, باسپانا تاۋقىمەتىن تارتىپ كەلگەن. روزا اكىمتاەۆا, قالا تۇرعىنى: – اللاعا شۇكىر, ورازانىڭ سوڭعى كۇندەرىندە باسپانالى بولىپ جاتىرمىن.
وسى باسپانادا ءوسىپ-ءونىپ, كوگەرىپ-كوكتەۋگە ءناسىپ ەتسىن. بارلىق كىسىلەرگە وسىنداي مەنىڭ قۋانىشىم جۇعىستى بولسىن. تولىق ەمەس وتباسى بولىپ تىركەلگەنمىن. قۋانىپ تۇرمىن, ارينە, بۇندايعا جەتكەن دە, جەتپەگەن دە بار. 17 جىلدان بەرى ۇيگە جەتۋ دەگەن ۇلكەن قۋانىشتا تۇرمىن. حالىقتىڭ از قامتىلعان توبىنا باسپانا بەرۋ, قامقورلىق كورسەتۋ – ەلىمىزدىڭ الەۋمەتتىك-ەكونوميكالىق دامۋ باعدارىنىڭ نەگىزگى باسىمدىعى. وڭىردە بۇل باعىتتا تىندىرىمدى تىرلىك اتقارىلىپ جاتقانىن سارالاعان وبلىس اكىمى بيىل تاعى 67 تۇرعىن ءۇي قۇرىلىسى جۇرگىزىلەتىنىن جەتكىزدى. نۇرلىبەك نالىباەۆ, وبلىس اكىمى: – وتكەن جىلى وڭىردە 4170 پاتەردى قۇرايتىن كوپقاباتتى ۇيلەر سالىنىپ, ەل يگىلىگىنە بەرىلدى. بيىلدىڭ وزىندە جاقىندا عانا 252 وتباسى جاڭا باسپاناعا يە بولدى. بيىل دا 3 مىڭعا جۋىق پاتەر سالىناتىن بولادى. وعان كەزەكتە تۇرعان ازاماتتار يە بولادى. ءبىز ونى جىل بارىسىندا تاعى ۇلعايتاتىن بولامىز.
جاقىن كۇندەرى «سىر جاستارى» جەڭىلدەتىلگەن يپوتەكالىق نەسيە باعدارلاماسىمەن تاعى دا 60 شاقتى جاس وتباسىعا باسپانا كىلتى تابىستالادى. وبلىس ورتالىعىنان بولەك اعىمداعى جىلى اۋدانداردا 700 پاتەرلىك ۇيلەر سالىنادى.
