جاڭالىقتار
قىزىلوردادا اۆتوسالون 20 اۆتوكولىكتى مەنشىك قۇقىعىنسىز ساتىپ جىبەرگەن: ساتىپ الۋشىلار كولىكسىز قالدى
فوتو: ۆيدەودان سكرين
قىزىلوردادا اۆتوسالون 20-عا جۋىق اۆتوكولىكتى مەنشىك قۇقىعىنسىز ساتىپ, تۇرعىنداردى الداعان, دەپ جازدى qandastar.kz
ادامدار 6-12 ميلليون تەڭگە تولەپ, كولىك العان, بىراق سوت شەشىمىمەن ولار باستاپقى يەلەرىنە قايتارىلدى. ساتىپ الۋشىلار كولىكسىز قالىپ, بانكتەرگە قارىز تولەۋدە. كەي كولىكتەر بىرنەشە رەت ساتىلعان. اۆتوسالوننىڭ ەكى قىزمەتكەرى سوتتالىپ, بىراق اۆتوسالون ءالى دە جۇمىس ىستەپ تۇر. زارداپ شەككەندەر قايدا جۇگىنەرىن بىلمەي وتىر. بۇل تۋرالى Stan.kz اقپارات اگەنتتىگى «جەتىنشى»ارناعا سىلتەمە جاساپ حابارلايدى.
قىزىلوردالىق تۇرعىن ك ۇلىمشات ەركىن اۆتوسالوننان كولىك ساتىپ الۋ ءۇشىن بانك ارقىلى 12 ميلليون تەڭگە كرەديت العان. قازىر ول اي سايىن 351 مىڭ تەڭگە تولەپ وتىر. بىراق كولىگى تاركىلەنىپ, ايىپ تۇراعىنا قويىلعان. سوت كولىكتى العاشقى يەسىنە قايتارۋ تۋرالى شەشىم شىعارعان. الايدا ەركىن نە ءۇشىن كرەديت تولەپ جاتقانىن تۇسىنبەي وتىر.
«نەگە مەنىڭ اتىما تىركەلگەن كولىكتى بىرەۋگە بەرۋىم كەرەك? كولىكتى ادال تاپقان اقشاما ساتىپ الدىم. ونى ماعان قايتارسىن. ءبىز ءۇشىنشى تاراپ رەتىندە بىرەۋدىڭ كىناسى ءۇشىن جاۋاپ بەرمەۋىمىز كەرەك», – دەدى ارىزدانۋشى ك ۇلىمشات ەركىن.
مۇنداي جاعدايعا تاعى كەمىندە 20 ادام تاپ بولعان. بەلگىلى بولعانداي, اۆتوسالون كولىكتەردى ساتىپ العان سوڭ, يەلەرىنە اقشا تولەمەگەن. ءتىپتى كەيبىر كولىكتەردى بىرنەشە ادامعا ساتقان فاكتىلەر دە انىقتالعان.
«سۋديا زارداپ شەككەن تاراپتى قولدادى. ال ءبىز ەشبىر تاراپقا جاتپايمىز. ايتار سوزىمىزگە دە مۇمكىندىك بەرىلمەدى. كولىكتەرىمىز تاركىلەنىپ, قايتارۋ شەشىمى شىقتى. ءبىز بۇعان نارازىمىز», – دەدى تۇرعىنداردىڭ ءبىرى گۇلسارا يگەنوۆا.
كەي كولىكتەر ءالى دە بانكتىڭ كەپىلدىگىندە بولعان. بىراق بانكتىڭ وكىلدەرى سوت وتىرىسىنا شاقىرىلماعان. وبلىستىق ادۆوكاتتار القاسىنىڭ ادۆوكاتى مۇحامەدقالي ءمادياروۆ ازاماتتاردىڭ قۇقىعى بۇزىلعانىن ايتادى.
«سوت ۇكىمى كونستيتۋتسياعا قايشى كەلەدى. سەبەبى ۇكىم بويىنشا كولىكتەر يەلەرىنە قايتارىلۋعا ءتيىس. بىراق ساتىپ الۋشىلاردىڭ كەيبىرى سوتتالعانداردان 3-5 ميلليون تەڭگە كولەمىندە اقشا العان. ولار كەلىسىم بويىنشا اقشالارىن جارتىلاي بولسا دا الدى», – دەدى زاڭگەر.
سوت ۇكىمى شىقسا دا, اۆتوسالون جۇمىسىن جالعاستىرىپ جاتىر. قالا سوتىنىڭ مالىمەتىنشە, اۆتوسالوننىڭ ەكى وكىلى سوتتالىپ, ءبىرى 4 جىلعا, ەكىنشىسى 4,5 جىلعا باس بوستاندىعىنان ايىرىلدى.
ەسكە سالايىق, بۇعان دەيىن قىزىلورداداكولىكتەرىن اۆتوسالونعا ساتقان وتىزعا جۋىق ادام كومپانيانىڭ الداپ كەتكەنىن ايتىپ, باس كوتەردى. سوزدەرىنشە, اۆتوسالوننىڭ يەلەرى “كولىكتى قىمبات باعاعا الامىز, 14 كۇننەن كەيىن اقشاسى تۇسەدى” دەپ كەلىسىمشارت جاساسقان. الايدا كەيىن كولىك تە, اقشا دا جوق بولعان.
