Qyzylordada avtosalon 20 avtokólikti menshik quqyǵynsyz satyp jibergen: Satyp alýshylar kóliksiz qaldy

Foto: Vıdeodan skrın

Qyzylordada avtosalon 20-ǵa jýyq avtokólikti menshik quqyǵynsyz satyp, turǵyndardy aldaǵan, dep jazdy qandastar.kz

Adamdar 6-12 mıllıon teńge tólep, kólik alǵan, biraq sot sheshimimen olar bastapqy ıelerine qaıtaryldy. Satyp alýshylar kóliksiz qalyp, bankterge qaryz tóleýde. Keı kólikter birneshe ret satylǵan. Avtosalonnyń eki qyzmetkeri sottalyp, biraq avtosalon áli de jumys istep tur. Zardap shekkender qaıda júginerin bilmeı otyr. Bul týraly Stan.kz aqparat agenttigi «Jetinshi»arnaǵa silteme jasap habarlaıdy.

Qyzylordalyq turǵyn Kúlimshat Erkin avtosalonnan kólik satyp alý úshin bank arqyly 12 mıllıon teńge kredıt alǵan. Qazir ol aı saıyn 351 myń teńge tólep otyr. Biraq kóligi tárkilenip, aıyp turaǵyna qoıylǵan. Sot kólikti alǵashqy ıesine qaıtarý týraly sheshim shyǵarǵan. Alaıda Erkin ne úshin kredıt tólep jatqanyn túsinbeı otyr.

«Nege meniń atyma tirkelgen kólikti bireýge berýim kerek? Kólikti adal tapqan aqshama satyp aldym. Ony maǵan qaıtarsyn. Biz úshinshi tarap retinde bireýdiń kinási úshin jaýap bermeýimiz kerek», – dedi aryzdanýshy Kúlimshat Erkin.

Mundaı jaǵdaıǵa taǵy keminde 20 adam tap bolǵan. Belgili bolǵandaı, avtosalon kólikterdi satyp alǵan soń, ıelerine aqsha tólemegen. Tipti keıbir kólikterdi birneshe adamǵa satqan faktiler de anyqtalǵan.

«Sýdıa zardap shekken tarapty qoldady. Al biz eshbir tarapqa jatpaımyz. Aıtar sózimizge de múmkindik berilmedi. Kólikterimiz tárkilenip, qaıtarý sheshimi shyqty. Biz buǵan narazymyz», – dedi turǵyndardyń biri Gúlsara Igenova.

Keı kólikter áli de banktiń kepildiginde bolǵan. Biraq banktiń ókilderi sot otyrysyna shaqyrylmaǵan. Oblystyq advokattar alqasynyń advokaty Muhamedqalı Mádııarov azamattardyń quqyǵy buzylǵanyn aıtady.

«Sot úkimi Konstıtýııaǵa qaıshy keledi. Sebebi úkim boıynsha kólikter ıelerine qaıtarylýǵa tıis. Biraq satyp alýshylardyń keıbiri sottalǵandardan 3-5 mıllıon teńge kóleminde aqsha alǵan. Olar kelisim boıynsha aqshalaryn jartylaı bolsa da aldy», – dedi zańger.

Sot úkimi shyqsa da, avtosalon jumysyn jalǵastyryp jatyr. Qala sotynyń málimetinshe, avtosalonnyń eki ókili sottalyp, biri 4 jylǵa, ekinshisi 4,5 jylǵa bas bostandyǵynan aıyryldy.

Eske salaıyq, buǵan deıin Qyzylordadakólikterin avtosalonǵa satqan otyzǵa jýyq adam kompanııanyń aldap ketkenin aıtyp, bas kóterdi. Sózderinshe, avtosalonnyń ıeleri “kólikti qymbat baǵaǵa alamyz, 14 kúnnen keıin aqshasy túsedi” dep kelisimshart jasasqan. Alaıda keıin kólik te, aqsha da joq bolǵan.