قىزىلوردادا ەر ادام ايەلىنىڭ قابىرعاسىن سىندىرعان

فوتو: ۆيدەودان كادر

قىزىلوردا وبلىسىندا تاسبوگەت كەنتىندە ەر ادام اۋرۋحانادا جۇمىس ىستەيتىن جۇبايىن قىزعانىشتان مەكەمە ىشىندە ۇرىپ-سوققان, دەپ حابارلايدى qandastar.kz Stan.kz-كە سىلتەمە جاساپ. 

وقيعاعا پوليتسەيلەرمەن سۇحباتتاسۋ ءۇشىن تاسبوگەت اۋىلىنا بارعان جۋرناليست جازيرا بەگالى كۋا بولعان.

زارداپ شەككەن ساۋلە اكيموۆانىڭ ايتۋىنشا, ول دارىگەردەن كۇيەۋىنىڭ مەديتسينالىق پورتالى تۋرالى مالىمەتتەردى سۇراعان. الايدا دارىگەر ايەلدىڭ جۇبايىنا قوڭىراۋ شالىپ, ونى وزىنە شاقىرتقان. اشۋلانعان ەر ادام مەديتسينالىق مەكەمەگە كەلىپ, ءدال سول جەردە ايەلىن اياۋسىز ۇرعان. ايەلگە ەكى قابىرعاسىندا جارىق دياگنوزى قويىلدى.

ساۋلە اۋرۋحانادا سانيتار بولىپ جۇمىس ىستەيدى. ونىڭ ەكى بالاسى بار.

“اۋىرىپ تۇرمىن, جانىم قينالىپ تۇر. كۇيەۋىمنىڭ ۇستىنەن ارىز جازىپ, قاماتقىم كەلەدى. اۋرۋحانا قاراپ, اۋرۋدى باستىن ءدارى بەردى. قابىرعامدى كۇيەۋىم ۇرىپ سىندىردى. وسىمەن ەكىنشى رەت. وتكەندە دە وسىلاي ەتكەن.

ارقاشان وسىلاي مەنى ۇرادى. ءىشىپ السا دا, ىشپەسە دە… تىلى دە جامان. بالاعاتتاي بەرەدى. اۋرۋحانادا سانيتار بولىپ جۇمىس ىستەيمىن. “سول جەردەگى ەركەكتەرمەن ويناسسىڭ” دەيدى. ول جەردە 99 پايىز ايەل ادام جۇمىس ىستەيدى. 8-اق ەر ادام بار ۇلكەن اۋرۋحانادا. سولارمەن مەنى قوسىپ, ۇنەمى بالالاردىڭ كوزىنشە بالاعاتتاپ, تابالاي بەرەدى”, – دەدى كەلىنشەك.

ال ساۋلەنىڭ كۇيەۋى بولسا ءوز قاتەلىگىن مويىندامايدى.

«مەنىڭ قاتىنىم, ءوزىم بىلەمىن. سوتقا جۇگىنەمىن, بۇل مەنىڭ وتباسىلىق ءىسىم», — دەدى ەر ادام ۆيدەودا.

قىزىلوردا وبلىسىنىڭ پوليتسيا دەپارتامەنتى دەنساۋلىققا قاساقانا اۋىرلىعى ورتاشا زيان كەلتىرۋ فاكتىسى بويىنشا قىلمىستىق ءىس قوزعاعانىن حابارلادى.

«جابىرلەنۋشى ەكى بالاسىمەن داعدارىس ورتالىعىنا ورنالاستىرىلدى. وندا ولارعا جان-جاقتى پسيحولوگيالىق, قۇقىقتىق جانە الەۋمەتتىك كومەك كورسەتىلەدى. وتباسىن قورعاۋ ماقساتىندا كۇدىكتىگە (3 توپتاعى مۇگەدەككە) قاتىستى قورعاۋ ۇيعارىمى شىعارىلدى», — دەپ حابارلادى پوليتسيا.

قىلمىستىق ءىس وبلىستىق پوليتسيا دەپارتامەنتى باسشىلىعىنىڭ باقىلاۋىندا.