قىزىلوردادا مەكتەپتىڭ باس ەسەپشىسى 7 جىلعا سوتتالدى

فوتو: اشىق دەرەككوز

قىزىلوردا وبلىسى, ارال اۋدانى №260 مەكتەپتىڭ باس ەسەپشىسى د.جاناليەۆ ەسىمدى ازامات ءوزىنىڭ قىزمەتىن اسىرا پايدالانعانى بەلگىلى بولدى, دەپ جازدى qandastar.kz

ەسەپشى 2023 جىلدىڭ قاڭتار ايى مەن 2024 جىلدىڭ تامىز ايى ارالىعىندا  جالاقىدان بولەك ءوز ەسەپشوتىنا قارجى اۋدارىپ, باس پايداسىنا جاراتقان. سوتتالۋشىنىڭ بۇل ءىس ارەكەتى ءار اي سايىن جالعاسىپ كەلگەن. ءتىپتى, ەڭبەك دەمالىسى كەزىندە دە ءوزىنىڭ ەسەپشوتىنا اقشا اۋدارعان.

تەرگەپ-تەكسەرۋ بارىسىندا سوتتالۋشىنىڭ جاساعان قىلمىستىق ارەكەتى سالدارىنان مەملەكەتكە جالپى سوماسى 20 417 530 (جيىرما ميلليون ءتورت ءجۇز ون جەتى مىڭ بەس ءجۇز وتىز) تەڭگە شىعىن كەلگەن.

سوتتىڭ شەشىمىمەن باس ەسەپشى قازاقستان رەسپۋبليكاسىنىڭ قىلمىستىق كودەكسىنىڭ 189-بابى 4-بولىگىنىڭ 2) تارماعىمەن كىنالى دەپ تانىلىپ, قارجىلىق ماتەريالدى جاۋاپتى قىزمەتپەن اينالىسۋ قۇقىعىنان 10 (ون) جىلعا شەتتەتىلىپ, 7 جىل مەرزىمگە باس بوستاندىعىنان ايىرۋ جازاسى تاعايىندالدى. ول جازاسىن قىلمىستىق-اتقارۋ جۇيەسىنىڭ ورتاشا قاۋىپسىز مەكەمەسىندە وتەيتىن بولادى. سونداي-اق, مەملەكەتكە كەلتىرىلگەن  20 417 530 تەڭگە قاراجاتتى ۇكىم زاڭدى كۇشىنە ەنگەن سوڭ 2 (ەكى) اي مەرزىمدە ءوز ەركىمەن مەملەكەت پايداسىنا ءوندىرۋ جۇكتەلدى.

وسىعان بايلانىستى قىزىلوردا وبلىسى بويىنشا ەكونوميكالىق تەرگەپ-تەكسەرۋ دەپارتامەنتى مەملەكەتتىك مەكەمەلەردىڭ بارلىق باسشىسىن بيۋدجەت قاراجاتىن جۇمساۋدى باقىلاۋعا الۋعا شاقىرىپ وتىر.