Qyzylordada mekteptiń bas esepshisi 7 jylǵa sottaldy

Foto: ashyq derekkóz

Qyzylorda oblysy, Aral aýdany №260 mekteptiń bas esepshisi D.Janalıev esimdi azamat óziniń qyzmetin asyra paıdalanǵany belgili boldy, dep jazdy qandastar.kz

Esepshi 2023 jyldyń qańtar aıy men 2024 jyldyń tamyz aıy aralyǵynda  jalaqydan bólek óz esepshotyna qarjy aýdaryp, bas paıdasyna jaratqan. Sottalýshynyń bul is áreketi ár aı saıyn jalǵasyp kelgen. Tipti, eńbek demalysy kezinde de óziniń esepshotyna aqsha aýdarǵan.

Tergep-tekserý barysynda sottalýshynyń jasaǵan qylmystyq áreketi saldarynan memleketke jalpy somasy 20 417 530 (jıyrma mıllıon tórt júz on jeti myń bes júz otyz) teńge shyǵyn kelgen.

Sottyń sheshimimen bas esepshi Qazaqstan Respýblıkasynyń Qylmystyq kodeksiniń 189-baby 4-bóliginiń 2) tarmaǵymen kináli dep tanylyp, qarjylyq materıaldy jaýapty qyzmetpen aınalysý quqyǵynan 10 (on) jylǵa shettetilip, 7 jyl merzimge bas bostandyǵynan aıyrý jazasy taǵaıyndaldy. Ol jazasyn qylmystyq-atqarý júıesiniń ortasha qaýipsiz mekemesinde óteıtin bolady. Sondaı-aq, memleketke keltirilgen  20 417 530 teńge qarajatty úkim zańdy kúshine engen soń 2 (eki) aı merzimde óz erkimen memleket paıdasyna óndirý júkteldi.

Osyǵan baılanysty Qyzylorda oblysy boıynsha ekonomıkalyq tergep-tekserý departamenti memlekettik mekemelerdiń barlyq basshysyn bıýdjet qarajatyn jumsaýdy baqylaýǵa alýǵa shaqyryp otyr.