قىزىلوردادا وقۋشى قىزدى جەزوكشەلىكپەن اينالىسۋعا ماجبۇرلەگەن: ۇستالعان كۇدىكتىلەر سانى سەگىزگە جەتتى

فوتو: اشىق دەرەككوز

ىشكى ىستەر مينيسترلىگى قىزىلوردادا 16 جاستاعى قىزدى جەزوكشەلىكپەن اينالىسۋعا ماجبۇرلەگەندەرگە قاتىستى تەرگەۋدىڭ ءمان-جايىن ءبولىستى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

ۆەدومستۆو دەرەگىنە سايكەس اتالعان ءىس قىلمىستىق كودەكستىڭ 134-بابى 3-بولىگى «ادامدار توبىنىڭ الدىن الا ءسوز بايلاسۋىمەن كامەلەتكە تولماعان ادامدى جەزوكشەلىكپەن اينالىسۋعا تارتۋ» بويىنشا تەرگەلىپ جاتىر.

«سونىمەن قاتار قىلمىستىق ءىس اياسىندا بىرنەشە باپ بويىنشا تەرگەۋ ءجۇرىپ جاتىر, ونىڭ ىشىندە پريتون ۇيىمداستىرۋ, بوپسالاۋ, ەسىرتكى تۇتىنۋعا يتەرمەلەۋ, ازاپتاۋ جانە ت.ب. بار», – دەلىنگەن مينيسترلىك جاۋابىندا.

بۇدان بولەك ءىس اياسىندا 8 كۇدىكتىگە قاتىستى قاماۋدا ۇستاۋ بۇلتارتپاس شاراسى تاعايىندالعان, ءبىر ادام ۇيقاماققا الىنعان.

بۇل دەرەك بويىنشا جۇرگىزىلگەن قىزمەتتىك تەكسەرىس بارىسىندا لاۋازىمدى تۇلعالار, قىزىلوردا وبلىسى پوليتسيا دەپارتامەنتىنىڭ قىزمەتكەرلەرىنە قاتاڭ سوگىس جاريالاندى.

ەسكە سالايىق, بۇعان دەيىن قىزىلوردادا سىنىپتاستارى 16 جاستاعى قىزدى جەزوكشەلىكپەن اينالىسۋعا ماجبۇرلەگەنى تۋرالى حابارلاعان ەدىك.