«قىزىلوردادا وقۋشىنى سىنىپتاستارى جەزوكشەلىكپەن اينالىسۋعا ماجبۇرلەگەن»: جانتۇرشىگەرلىك جاعدايدىڭ ءمان-جايى

فوتو: اشىق دەرەككوز

قىزىلوردا وبلىسىندا جاعاۇستاتار جاعداي بولعان. «نەمولچي» قورىنىڭ جەتەكشىسى دينا ءتاڭسارىنىڭ سوزىنشە, 16 جاستاعى قىزدى سىنىپتاستارى جەزوكشەلىكپەن اينالىسۋعا ماجبۇرلەگەن, – دەپ حابارلايدى qandastar.kz Massaget.kz تىلشىسىنە سىلتەمە جاساپ.

دينا ءتاڭسارى 16 جاستاعى وقۋشىنى سىنىپتاستارى اقپاننان باستاپ تۋىستارىمەن جەزوكشەلىككە ساتقانىن, قىز – ءبىر ءۇيدىڭ جالعىزى ەكەنىن مالىمدەدى.

«ول اقپاننان باستاپ جوعالىپ كەتە باستاعان, اتا-اناسى پوليتسياعا, كامەلەتكە تولماعاندار ءىسى جونىندەگى ينسپەكتورعا ىزدەۋ ءۇشىن جۇگىنگەن, بىراق ولار قىزدى ىزدەمەگەن, ول از بولعانداي اتا-انا قۇقىعىنان ايىرامىز دەپ قورقىتقان, قورىققان اتا-انا قىزدارىن وزدەرى ىزدەگەن», – دەدى ول.

«نەمولچي» قورىنىڭ جەتەكشىسى ۇسىنعان مالىمەتكە سۇيەنسەك, قىز اۋىق-اۋىق بايلانىسقا شىعىپ, ۆيدەومەن حابارلاسىپ, كافەدە داياشى نەمەسە گۇل ساتاتىن دۇكەندە ساتۋشى بولىپ جۇمىس ىستەيتىنىن ايتقان. اتا-اناسى ايتىلعان جەرگە بارعاندا, ول جاقتاعىلار قىزدىڭ جاي عانا ۆيدەو ءتۇسىرىپ, كەتىپ قالعانىن جەتكىزگەن. قىزدىڭ سوزىنشە, اتا-اناسى شۋ شىعارماس ءۇشىن ونى وسىلاي جاساۋعا ءماجبۇر ەتكەن.

«اقپاننان باستاپ ول مەكتەپتەگى ساباعىنا قاتىسپاعان, كەيدە اتا-اناسىنا جىبەرىپ تۇرعان كەزدە عانا ساباققا بارىپ جۇرگەن. ديرەكتور مۇعالىمدەرمەن بىرگە قىزعا پسيحولوگيالىق تۇرعىدان قىسىم جاساي بەرگەن», – دەپ جازدى ءتاڭسارى.

قوعام بەلسەندىسىنىڭ سوزىنە سۇيەنسەك, قىزدىڭ سىنىپتاستارى تۋىستارى استانادان ەكەنىن, ول جاقتا «كرىشالارى» بارىن, ءتىپتى قىزعا اتا-اناسىن ولتىرەتىنىن ايتىپ قورقىتقان.

«قىز اتا-اناسى ءۇشىن قورىققان, ويتكەنى ول بۇل ادامداردىڭ قاۋىپتى ەكەنىن بىلگەن. وعان ۇنەمى ەسىرتكى بەرىپ, زورلاعان. بۇل تۋرالى ءبارى بىلگەن, قىزدىڭ اتا-اناسى مۇعالىمدەر مەن مەكتەپ ديرەكتورى, ۋچاسكەلىك پوليتسەي بىلەتىنىنە دە سەنىمدى. كەشە مۇنىڭ ءبارى اشىلدى. ويتكەنى ولار قىزدان ۇلكەن سومادا اقشا سۇراعان, ال بۇل سومانى تاپپاسا, شاشىن, قاستارىن قىرىپ تاستايتىنىن ايتقان. قىز اقشانى Instagram-داعى دوسىنان سۇراۋدى ۇيعارعان, ال دوسى شىداي الماي, قىزدىڭ اتا-اناسىنا ءمان-جايدى حابارلاعان.

شىن مانىندە جاعداي ادامشوشيتىنداي بولىپ شىقتى, قىزدى ازاپتاپ, مەفەدروندى كۇشتەپ قابىلداۋعا ءماجبۇر ەتكەن, تۇنشىقتىرىپ, بالقىتىلعان پاكەتتەرمەن كۇيدىرىپ, قورلاعان, جەزوكشەلىكپەن اينالىساتىن ايەلدەردىڭ سايتىنا تىركەپ, جەزوكشەلىكپەن اينالىسۋعا ءماجبۇر ەتىپ, اقشاسىن الىپ جۇرگەن», – دەپ جازدى «نەمولچي» قورىنىڭ جەتەكشىسى.

دينا ءتاڭسارىنىڭ ايتۋىنشا, قىزىلوردا پوليتسياسى تەرگەۋ جۇرگىزىپ جاتىر, كۇدىكتىلەر ۇستالعان.

Massaget.kz بۇل ماسەلەگە وراي قىزىلوردا وبلىسىنىڭ ءبىلىم باسقارماسىنا جانە پوليتسيا دەپارتامەنتىنە حابارلاستى. ءتيىستى ۆەدومستۆولار رەسمي ساۋال جولداۋدى سۇرادى.