قىزىلوردادا ءتىسىن ەمدەتكەن بالا مۇگەدەك بولىپ قالعان

فوتو: Pixabay

قىزىلوردادا بالا ءتىسىن ەمدەيمىن دەپ مۇگەدەك بولىپ قالعان, دەپ حابارلايدى Ozgeris.Info.

ءىستىڭ ءمان-جايىن جوعارعى سوتتاعىلار ايتتى. قىزىلوردالىق تۇرعىن بالاسىنىڭ ءتىسى اۋرۋىنا بايلانىستى ورتالىق قالالىق ەمحانانىڭ بالالار ستوماتولوگياسىنا بارعان. ءتىس دارىگەرى بالانى ەمدەپ, ءتىسىن ج ۇلىپ تاستاعان. كەلەسى كۇنى بالانىڭ جاق سۇيەگى ءىسىنىپ, جالپى دەنساۋلىعى ناشارلاي باستاعان.

كەيىن بالاعا وبلىستىق كوپسالالى اۋرۋحانانىڭ جاق-بەت بولىمشەسىندەگىلەر «سول جاق تومەنگى جاقتىڭ جەدەل ءىرىڭدى ودونتوگەندى فلەگموناسى, 7,5 ءتىسىن جۇلعانداعى جاعدايى» دياگنوزىن قويعان. وسىلايشا بالاعا ەكى رەت وتا جاسالعان.

ارادا التى اي وتكەندە بالانىڭ جاق سۇيەگى قايتادان ءىسي باستاعان, ءىرىڭدى جاراسى جازىلماي, ولار الماتى قالاسىندا اقىلى نەگىزدە حيرۋرگيالىق ارالاسۋ ارقىلى اۋرۋحانادا ەمدەلۋگە ءماجبۇر بولعان.

«مەديتسينالىق جانە فارماتسەۆتيكالىق باقىلاۋ دەپارتامەنتى انانىڭ شاعىمى بويىنشا جۇرگىزىلگەن ەمحانانى تەكسەرۋ قورىتىندىسىنا سايكەس, ەمحانا ءتىس دارىگەرى كامەلەتكە تولماعان بالاعا مەديتسينالىق كومەك كورسەتۋ كەزىندە كلينيكالىق دياگنوستيكا جانە ەمدەۋ حاتتامالارىن ساقتاماعان. ونىڭ ءتىسىن ورتا مەديتسينالىق ءبىلىمى بار ستوماتولوگ الىپ تاستاعان, ەمدەۋ الدىندا جاق سۇيەگىنىڭ رەنتگەنوگرافياسى وبەكتيۆتى تەكسەرىلمەي, اسقىنۋلار – تومەنگى جاقتىڭ قابىنۋ پروتسەسى بولعان», – دەلىنگەن حابارلامادا.

بالانىڭ اناسى ستوماتولوگيالىق ەمحانادان وزىنە كەلتىرىلگەن مورالدىق جانە ماتەريالدىق شىعىندى وتەۋدى سۇراپ, سوتقا جۇگىنگەن. تالاپ قويۋدا ول ەمحانا مەديتسينا قىزمەتكەرىنىڭ سالعىرتتىعىنان جانە العاشقى مەديتسينالىق كومەكتى دۇرىس كورسەتپەۋىنەن اۋرۋ اسقىنىپ, بالا 2 جىلعا جۋىق ۇيىقتاي الماي, دارىگەرلەردىڭ قورىتىندىسى بويىنشا مۇگەدەك بولىپ قالعانىن كورسەتكەن.

سونداي-اق ولارعا اقىلى نەگىزدە ءۇش وپەراتسيا جاساۋعا, ءتىس ەمدەۋگە جانە دارىگەرلەردەن كەڭەس الۋعا ءماجبۇر بولعانى اتاپ وتىلگەن. سوت ستوماتولوگيالىق ەمحانادان مورالدىق شىعىن مەن ماتەريالدىق شىعىن ءۇشىن 1,5 ميلليون تەڭگەدەن استام وتەماقى ءوندىردى.