قىزىلوردادا تۇرعىن ۇيدە گاز جارىلىپ, ءتورت ءجاسوسپىرىم اۋرۋحاناعا جەتكىزىلدى

فوتو: قىزىلوردا تجد

قىزىلوردادا گاز جارىلۋى سالدارىنان جەكە تۇرعىن ءۇي قيراپ قالدى. ءتورت ءجاسوسپىرىم جاراقات الىپ, جانساقتاۋ بولىمىنە جەتكىزىلدى, دەپ حابارلايدى Qandastar.kz.

ۆەدومستۆو مالىمەتىنشە, 28 شىلدەدە ساعات 19-دان 56 مينۋت وتكەندە قىزىلوردا قالاسىنىڭ ءال-فارابي شاعىن اۋدانىندا جەكە تۇرعىن ۇيدە گاز جارىلىپ, تۇرعىن ءۇي قيراعان. ءورت بولماعان.

«4 ءجاسوسپىرىم زارداپ شەكتى. قازىرگى تاڭدا ولار بالالار اۋرۋحاناسىنىڭ جانساقتاۋ بولىمىندە ەم شارالارىن الۋدا», – دەلىنگەن وبلىستىق توتەنشە جاعدايلار دەپارتامەنتىنىڭ حابارلاماسىندا.

تجد وكىلدەرى اتا-انالارعا بالالار مەن جاسوسپىرىمدەردى ەرەسەكتەردىڭ باقىلاۋىنسىز قالدىرماۋدى ەسكەرتتى.

«بالالارعا ۇنەمى وتباسىندا قاۋىپسىزدىك قاعيداسىن قاتاڭ ساقتاۋدى ناسيحاتتاڭىزدار! اسىرەسە, ەلەكتر, گاز قوندىرعىلارىن پايدالانۋدا قاۋىپسىزدىك ەرەجەسىن ساقتاۋدى تۇسىندىرىڭىزدەر», – دەدى ماماندار.