قىزىلوردادا ۇيدە ەسىرتكى وسىرىلگەن

قىزىلوردالىق پوليتسەيلەر بيىل 8 ايدا ەسىرتكى قىلمىسىنا قارسى ءىس-قيمىل جۇرگىزۋ ناتيجەسىندە 210 قۇقىقبۇزۋشىلىقتى انىقتادى, دەپ حابارلايدى Qandastar.kz.

ونىڭ باسىم بولىگى ەسىرتكىنى ءوسىرۋ, وتكىزۋ جانە جارنامالاۋعا باعىتتالعان.

وبلىستىق پوليتسيا دەپارتامەنتى مالىمدەگەندەي, زاڭسىز اينالىمنان 1 توننا 315 كەلى ەسىرتكى الىندى.

— ايماقتا ەسىرتكىنىڭ باسقا تۇرلەرىنە قاراعاندا ماريحۋانا كوبىرەك ءوتىمدى بولىپ تۇر. سونداي-اق سينتەتيكالىق ەسىرتكى زاڭسىز اينالىمعا ەنگەلى گەرويندى اينالىمنان ىعىستىردى. ونىڭ ينتەرنەت جانە الەۋمەتتىك جەلىلەر ارقىلى تارالۋى ۇيىمداسقان قىلمىستىق توپتاردى انىقتاۋعا كەرى اسەرىن تيگىزىپ وتىر, — دەدى دەپارتامەنتتىڭ باسقارما باستىعى ءبىرجان باعىسوۆ.

سونداي-اق ءۇي جاعدايىندا سورا وسىرگەن 5 فيتوزەرتحانا انىقتالدى. ماۋسىم ايىندا اسا ءىرى مولشەردە سينتەتيكالىق ەسىرتكى تاسىمالداعان قىزىلوردا جانە ماڭعىستاۋ وبلىستارىنىڭ تۇرعىندارى قۇرىقتالدى.

— جەدەل پروفيلاكتيكالىق ءىس-شارالار ناتيجەسىندە ەسىرتكىنى جارنامالايتىن گراففيتي سۋرەتتەر ازايدى. «كيبەرنادزور» اقپاراتتىق جۇيەسىنە سينتەتيكالىق ەسىرتكىنى جارنامالايتىن 1050 سايت ەنگىزىلىپ, بۇعاتتالدى. پروفيلاكتيكالىق ءىس-شارالار وتكىزۋگە جەرگىلىكتى بيۋدجەتتەن 17 ملن تەڭگە ءبولىندى, — دەدى باعىسوۆ.