قىزىلوردادا جوعالىپ كەتكەن دارىگەردىڭ دەنەسى تابىلدى

فوتو: «قىزىلوردا ەرىكتىلەرى» قوعامدىق قورى

قىزىلوردادا ەكى كۇن بۇرىن جوعالىپ كەتكەن ەر ادام وكىنىشكە وراي, ءولى كۇيىندە تابىلدى, دەپ حابارلايدى Qandastar.kz. 

ەرىكتىلەر بۇعان دەيىن 20 شىلدەدە جوعالىپ كەتكەن 25 جاستاعى ەر ادامعا ىزدەۋ جاريالاعان بولاتىن.

وندا قىزىلوردالىق ەر ادام جۇمىستان شىققاننان كەيىن, ۇيىنە ورالماعانى ايتىلعان. ول وبلىستىق كوپسالالى اۋرۋحانادا جۇمىس ىستەگەن.

– تجد, پد قىزمەتكەرلەرىنىڭ, ابىلايحاننىڭ تۋىستارىنىڭ جانە وزگە دە ەرىكتى ازاماتتاردىڭ كۇشىمەن ىزدەۋ جۇمىستارى جۇرگىزىلدى. وكىنىشكە قاراي, ءۇمىت اقتالمادى, ول ءولى كۇيىندە تابىلدى. يماندى بولسىن. جاس جىگىتتىڭ نەدەن قايتىس بولعانى ازىرگە بەلگىسىز. دوستار, ابىلايحاندى ىزدەۋگە بەي-جاي قاراماي, ات سالىسقاندارىڭىزعا راحمەت, – دەپ جازدى «قىزىلوردا ەرىكتىلەرى» قوعامدىق قورىنىڭ اتقارۋشى ديرەكتورى ولگا چەباكوۆا Facebook پاراقشاسىندا.

وبلىستىق پوليتسيا دەپارتامەنتىنىڭ ءباسپاسوز قىزمەتى جوعالعان جاس جىگىتتى ىزدەۋگە ەكى كۇن ىشىندە پد, پوليتسيا باسقارماسى, تجد جەكە قۇرامى, ەرىكتىلەر مەن جەرگىلىكتى تۇرعىندار تارتىلعانىن اتاپ ءوتىپ, جاس جىگىتتىڭ قازا تاپقانى تۋرالى اقپاراتتى راستادى. الايدا قايدان, قالاي تابىلعانى جازىلماعان.

– 23 شىلدەدە جوعالعان ادامنىڭ دەنەسى تابىلدى. بۇل فاكت سوتقا دەيىنگى تەرگەپ-تەكسەرۋلەردىڭ بىرىڭعاي تىزىلىمىندە تىركەلگەن. ەر ادامنىڭ ءولىمىنىڭ ناقتى سەبەبىن انىقتاۋ ماقساتىندا قاجەتتى سوت-مەديتسينالىق ساراپتاما تاعايىندالدى جانە وسى ساراپتامانىڭ قورىتىندىسىن كۇتىپ وتىرمىز. تۇلعا انىقتالدى. تەرگەۋ ارەكەتتەرى جالعاسادى. ايماق پوليتسياسى مارقۇمنىڭ جاقىندارى مەن تۋىستارىنا شىن جۇرەكتەن كوڭىل ايتادى, – دەپ حابارلادى ۆەدومستۆونىڭ ءباسپاسوز قىزمەتى.