جاڭالىقتار
قىزىلوردادا جىنىستىق قۇلدىقتا بولعان وقۋشى قىزدىڭ ءىسى بويىنشا العاشقى ۇكىم شىقت
فوتو: اشىق دەرەككوز
ايىپتالۋشى رەتىندە قىز بالادان ءىرى كولەمدە قارجى بوپسالاعان وڭىرلىك قىلمىسقا قارسى كۇرەس باسقارماسىنىڭ قىزمەتكەرى تانىلعان. ول ازامات قىز بالادان 700 مىڭ تەڭگە بوپسالاعان. بۇل اقشانىڭ 50 مىڭىن ءوزى الىپ, قالعانىن قىلمىسقا قارسى كۇرەس باسقارماسىنىڭ قىزمەتكەرلەرىنە بەرەتىنىن ايتقان. بۇدان بولەك, ايىپتالۋشى وقۋشى قىزدىڭ سومكەسىنەن 35 مىڭ تەڭگەسىن الىپ العان. «نەمولچي» قورىنىڭ مالىمەتىنشە, پروكۋراتۋرا ايىپتالۋشىنى 7 جىل باس بوستاندىعىنان ايىرۋدى سۇراعان, دەپ جازادى qandastar.kz
«سوت ونى قىلمىستىق كودەكستىڭ 194-باپ بويىنشا كىنالى دەپ تاپتى جانە 4,5 جىلعا باس بوستاندىعىنان ايىردى», — دەدى قور باسشىسى دينا ءتاڭسارى.
ءىستى بولعان قۇقىق قورعاۋ ورگاندارىنىڭ قىزمەتكەرىنىڭ كىناسىن دالەلدەۋ ءۇشىن پسيحولوگيالىق-پسيحياتريالىق ساراپتاما جاسالىپ, قىلمىس ورنىندا تەكسەرۋ جۇرگىزىلىپ, جابىرلەنۋشى تاراپپەن بەتپە-بەت كەزدەسىپ, وقۋشى قىزدى كۋالىك ەتكەن. ەسكە سالايىق, تامىز ايىندا قىزىلوردادا بىرنەشە مەكتەپ وقۋشىسى 16 جاسار قىزدى سەكسۋالدى قۇلدىقتا ۇستاعان دەگەن اقپارات تارادى. وقۋشىعا زورلىق كورسەتكەن قاتارلاستارى, ونىڭ اۋزىن جابۋ ءۇشىن قورقىتىپ, ەسىرتكىگە وتىرعىزعان. قىزىلوردا سوتى 3 كۇدىكتى ازاماتتى 2 ايعا قاماعان. كەيىننەن ىسكە قۇقىق قورعاۋ ورگاندارىنىڭ قىزمەتكەرلەرى مەن مەكتەپ ۇجىمىنىڭ دا قاتىسى بار دەگەن كۇدىكپەن قاماۋعا الىنعاندار سانى 11 ادامعا جەتتى. «نەمولچي» قورىنىڭ مالىمەتىنشە, قىز بالانى مىڭنان اسا رەت زورلاعان.
