قىزىلوردالىق يمام پارا بەرىپ, باسى داۋعا قالا جازداعان

فوتو: اراشا.كز

قىزىلوردادا سىبايلاس جەمقورلىققا قارسى اگەنتتىكتىڭ بۇرىنعى قىزمەتكەرى سەرىك ابىلقايىروۆ ءوزىنىڭ تۋىسى – «ىبىراي مولدا» مەشىتىنىڭ يمامى تالعات نۇرماندى الدادى, – دەپ حابارلادى qandastar.kz Nege.kz.-كە سىلتەمە جاساپ.

ول تۋىسىنىڭ سەنىمىن پايدالانىپ, يمامعا دەسترۋكتيۆتى ءدىني اعىمدارمەن بايلانىسى بار دەگەن كۇدىكپەن تەكسەرىس جۇرگىزىلگەلى جاتقانىن ايتقان. ابىلقايىروۆتىڭ ايتۋىنشا, كۇدىكتىڭ تۋىنداۋىنا يمامنىڭ ەكى ايەلمەن تۇرۋى سەبەپ بولعان. بۇل ونىڭ كىرىس كوزدەرىنە قاتىستى سۇراقتار تۋىنداتقان.

مۇمكىن بولاتىن زارداپتاردان قورىققان تالعات نۇرمان 2 ميلليون تەڭگە بەرۋ تۋرالى تالاپقا كەلىسىپ, 1 ميلليون تەڭگە نەسيە الىپ, اقشانى ابىلقايىروۆقا ۇستاتقان. الايدا كەيىن الداۋدىڭ قۇربانى بولعانىن تۇسىنگەن سوڭ قۇقىق قورعاۋ ورگاندارىنا جۇگىنگەن. وسىدان كەيىن ابىلقايىروۆ اقشانى قايتارىپ بەرگەن.

شىن مانىندە يمامعا قاتىستى ەشقانداي تەكسەرىس جوسپارلانباعانى جانە ابىلقايىروۆتىڭ جەكە مۇددەلەرىن كوزدەگەنى انىقتالدى. سوت ونى الاياقتىق جاساعانى ءۇشىن 20 ميلليون تەڭگە ايىپپۇلمەن جازالادى.

نۇرمانعا قاتىستى پارا بەرۋ ارەكەتى ءۇشىن كىنا تاعىلىپ, بىراق ول ءوز ەركىمەن قۇقىق قورعاۋ ورگاندارىنا جۇگىنىپ, كىناسىن مويىنداعاندىقتان قىلمىستىق جاۋاپكەرشىلىكتەن بوساتىلدى.