قىزىلوردالىق تۇرعىن ايالدامادا قازاق تىلىندە اقپارات بولماعانى ءۇشىن سوتتاسىپ, جەڭىپ شىقتى

فوتو: syrboyi.kz

قىزىلوردا تۇرعىنى مامانداندىرىلعان اۋدانارالىق اكىمشىلىك سوتىنا ايالدامالارداعى اقپاراتتىق ستەندتەردە مەملەكەتتىك تىلدەگى مالىمەتتەر بولماعانىنا ارىزداندى, دەپ حابارلايدى  qandastar.kz  Skifnews.kz اقپارات پورتالىنا سىلتەمە جاساپ.

سوت اۆتوبۋس ايالدامالارىنداعى اقپاراتتاردى مەملەكەتتىك تىلدە ورناتۋدى مىندەتتەدى

قالا تۇرعىنى ا. اۆتوبۋس ايالدامالارىنداعى اقپاراتتاردى مەملەكەتتىك تىلدە جازۋدى مىندەتتەۋدى سۇراپ, قىزىلوردا قالاسىنىڭ مامانداندىرىلعان اۋدانارالىق اكىمشىلىك سوتىنا جۇگىنگەن.

«تالاپ قويۋشى ءوزىنىڭ تالاپ قويۋىندا بىرنەشە مارتە وكىلەتتى ورگاندارعا جۇگىنىپ, ايالدامالارداعى اقپاراتتاردى مەملەكەتتىك تىلدە جازۋ كەرەكتىگىن ايتقانىن, الايدا, ەشقانداي ناتيجە بولماعانىن, سودان سوتقا جۇگىنۋگە ءماجبۇر بولعانىن, مەملەكەتتىك تىلدە جازىلماعان اقپاراتتاردى ورناتۋ زاڭ تالاپتارىن ورەسكەل بۇزاتىنىن كورسەتكەن.

سوتتا انىقتالعانداي, تۇرعىن ءۇي-كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى ءبولىمى مەملەكەتتىك ساتىپ الۋ تۋرالى شارتى نەگىزىندە جاۋاپتى سەرىكتەستىككە مارشرۋتتىق اۆتوبۋس ايالدامالارىنا 26 دانا اقپاراتتىق تاقتانى ورناتۋدى تاپسىرعان. الايدا, اقپاراتتىق تاقتالارداعى اقپاراتتار مەملەكەتتىك تىلدە جازىلماعان», – دەلىنگەن قىزىلوردا وبلىسىنىڭ مامانداندىرىلعان اۋدانارالىق اكىمشىلىك سوتىنىڭ حابارلاماسىندا.

سوت تالاپ قويۋشىنىڭ مەملەكەتتىك تىلدە اقپاراتتار الۋعا قاتىستى كونستيتۋتسيالىق قۇقىقتارى بۇزىلعانىن ەسكەرىپ, تالاپ قويۋدى قاناعاتتاندىرىپ, جاۋاپكەرگە اۆتوبۋس ايالدامالارىنداعى اقپاراتتاردى مەملەكەتتىك تىلدە ورناتۋدى مىندەتتەدى.

سونىمەن قاتار, ءبولىمنىڭ تۇلعالارىنىڭ تاراپىنان جىبەرىلگەن بۇزۋشىلىقتار بويىنشا جەكە ۇيعارىم شىعاردى.

سوت شەشىمى زاڭدى كۇشىنە ەنىپ,  ورىندالدى.