قارجى جانە تولەمدەر
قىزىلجارلىق فەرمەر سۇتكە بولىنگەن سۋبسيدياعا Land Cruiser ساتىپ العان
فوتو:كوللاج Ertenmedia
قارجى مونيتورينگ اگەنتتىگى سولتۇستىك قازاقستان وبلىسىنداعى اۋىل شارۋاشىلىعى كووپەراتيۆىنىڭ باسشىسى 50 ميلليون تەڭگەدەن استام سۋبسيديانى زاڭسىز يەمدەنگەنىن انىقتادى, — دەپ حابارلايدى qandastar.kz Ertenmedia.kz-كە سىلتەمە جاساپ.
تەرگەۋ دەرەگىنە سايكەس, فەرمەر 2019 جىلدىڭ مامىرى مەن 2020 جىلدىڭ ناۋرىزى ارالىعىندا جالعان قۇجاتتار ارقىلى ءسۇت وڭدەۋگە بولىنگەن مەملەكەتتىك قاراجاتتى زاڭسىز العان.
ول جەكە كاسىپكەرلەردەن شيكى ءسۇت ساتىپ الىنعانى تۋرالى قۇجاتتاردى قولدانىپ, سارى ماي وندىرىلگەنىن دە جالعان مالىمدەپ وتىرعان.
سوت بۇل كەلىسىمدەردىڭ ءبارىن جارامسىز دەپ تاپتى. تەرگەۋ بارىسىندا كۇدىكتىنىڭ الىنعان قارجىنى ءوز ماقساتىنا پايدالانىپ, Toyota Land Cruiser Prado كولىگىن ساتىپ العانى, ونى سەنىمدى وكىلدىڭ اتىنا راسىمدەگەنى انىقتالدى. سوت قاۋلىسىمەن اتالعان اۆتوكولىككە ارەست قويىلدى.
كۇدىكتىنىڭ ءوزى قاماۋدا وتىر, وعان قاتىستى ەكى اي مەرزىمگە «قاماۋدا ۇستاۋ» تۇرىندەگى بۇلتارتپاۋ شاراسى تاعايىندالدى.
تەرگەۋشىلەر ىسكە قاتىستى قوسىمشا ايعاقتاردى جيناۋدى جالعاستىرۋدا.
بۇدان وزگە بارلىق اقپارات قر قپك 201-بابىنا سايكەس تەرگەۋ مۇددەسىندە جاريالاۋعا جاتپايدى.
