Qyzyljarlyq fermer sútke bólingen sýbsıdııaǵa Land Cruiser satyp alǵan

Foto:Kollaj Ertenmedia

Qarjy monıtorıng agenttigi Soltústik Qazaqstan oblysyndaǵy aýyl sharýashylyǵy kooperatıviniń basshysy 50 mıllıon teńgeden astam sýbsıdııany zańsyz ıemdengenin anyqtady, — dep habarlaıdy qandastar.kz Ertenmedia.kz-ke silteme jasap.

Tergeý deregine sáıkes, fermer 2019 jyldyń mamyry men 2020 jyldyń naýryzy aralyǵynda jalǵan qujattar arqyly sút óńdeýge bólingen memlekettik qarajatty zańsyz alǵan.

Ol jeke kásipkerlerden shıki sút satyp alynǵany týraly qujattardy qoldanyp, sary maı óndirilgenin de jalǵan málimdep otyrǵan.

Sot bul kelisimderdiń bárin jaramsyz dep tapty. Tergeý barysynda kúdiktiniń alynǵan qarjyny óz maqsatyna paıdalanyp, Toyota Land Cruiser Prado kóligin satyp alǵany, ony senimdi ókildiń atyna rásimdegeni anyqtaldy. Sot qaýlysymen atalǵan avtokólikke arest qoıyldy.

Kúdiktiniń ózi qamaýda otyr, oǵan qatysty eki aı merzimge «qamaýda ustaý» túrindegi bultartpaý sharasy taǵaıyndaldy.

Tergeýshiler iske qatysty qosymsha aıǵaqtardy jınaýdy jalǵastyrýda.

Budan ózge barlyq aqparat QR QPK 201-babyna sáıkes tergeý múddesinde jarııalaýǵa jatpaıdy.