«لاۋازىمىن قايتارماق بولدى»: سكريپكاشى ايمان مۇساقوجاەۆا الاياققا اقشا بەرىپ, الدانىپ قالعان

فوتو: اشىق دەرەككوز

الماتى قالاسىنىڭ المالى اۋداندىق سوتى ءوزىن ۇقك توراعاسىنىڭ تۋىسى رەتىندە تانىستىرىپ, «اقشاعا جۇمىسقا تۇرعىزامىن جانە قىزمەتكە قايتا تاعايىندايمىن» دەپ ۋادە بەرگەن 38 جاستاعى ازاماتقا قاتىستى ۇكىم شىعاردى, دەپ حابارلادى qandastar.kz tengrinews.kz-كە سىلتەمە جاساپ.

سوت ماتەريالدارىنا سايكەس, 2024 جىلدىڭ ناۋرىزىندا ا.ت. ەسىمدى ازامات ا.م.-عا ۇقك-عا قىزمەتكە ورنالاستىرىپ بەرەمىن دەپ ۋادە بەرىپ, ودان 6 497 400 تەڭگە العان.

سونداي-اق, ول بەلگىلى سكريپكاشى ايمان مۇساقوجاەۆانى قىزمەتكە قايتا تاعايىندايمىن دەپ, ونىڭ جۇبايى ب.ا.-دان دەلدال ا.ا. ارقىلى 45 ميلليون تەڭگە العان.

كەيىن ول مۇساقوجاەۆانى قىزمەتكە قالپىنا كەلتىرۋ ءۇشىن قالعان سومانى تولەۋ قاجەت دەگەن جەلەۋمەن ا.ا.-عا رەسمي تۇردە تيەسىلى, باعاسى 33 ميلليون تەڭگە تۇراتىن LI L9MX ماركالى كولىكتى دە يەمدەنگەن.

سوت ونىڭ ارەكەتىن بىرنەشە رەت جاسالعان, اسا ءىرى كولەمدەگى الاياقتىق دەپ كۆاليفيكاتسيالادى. ايىپتالۋشى كىناسىن تولىق مويىنداپ, جابىرلەنۋشىلەرگە كەلتىرىلگەن شىعىننىڭ ورنىن تولتىردى. جابىرلەنۋشىلەر ارىز-شاعىمدارىنان باس تارتىپ, ازاماتتىق تالاپتار قاراۋسىز قالدىرىلدى.

سوعان قاراماستان, سوت وعان 5 جىل باس بوستاندىعىنان ايىرۋ جازاسىن تاعايىندادى. الايدا, قازاقستان كونستيتۋتسياسىنىڭ 30 جىلدىعىنا بايلانىستى جاريالانعان راقىمشىلىققا سايكەس, جازا مەرزىمى 4 جىلعا قىسقارتىلدى. جازا شارتتى تۇردە تاعايىندالدى جانە پروباتسيالىق باقىلاۋ بەلگىلەندى.

سوت ونى قاماۋدان بوساتىپ, بۇلتارتپاۋ شاراسىن جويدى. ايىپتالۋشىعا تۇراقتى تۇراتىن مەكەنجايىن اۋىستىرۋعا, پروباتسيا قىزمەتىن حاباردار ەتپەي ەلدىمەكەننەن تىس شىعۋعا, سونداي-اق تۇنگى كوڭىل كوتەرۋ ورىندارىنا بارۋعا تىيىم سالىندى.

ەسكە سالا كەتەيىك, ايمان مۇساقوجاەۆا 1998 جىلدان بەرى قازاق ۇلتتىق ونەر ۋنيۆەرسيتەتىن باسقارىپ كەلدى. 2024 جىلدىڭ باسىندا زەينەتكە شىعۋىنا بايلانىستى لاۋازىمىنان بوساتىلعان بولاتىن.

تولىق نۇسقاسىنا گيپەرسىلتەمە بەرۋدى ۇمىتپاڭىز: https://turkystan.kz/article/263846-lauazymyn-qaitarmaq-boldy-skripkasy-aiman-musaxodzaeva-alaiaqqa-aqsa-berip-aldanyp-qalgan