جاڭالىقتار
ءلاززات تانىسباي «قازاقستاننان» كەتتى
فوتو: اشىق دەرەككوز
ءلاززات تانىسباي «قازاقستان» تەلەراديوكورپوراتسياسىنىڭ باسقارما ءتورايىمى رەتىندەگى قىزمەتىن اياقتادى, دەپ جازادى qandastar.kz
«بىرگە قىزمەت ەتكەن ارىپتەستەرىمە العىس ايتا وتىرىپ, باسقارما ءتورايىمى رەتىندەگى قىزمەتىمدى اياقتاۋدى ءجون سانادىم. التى جىلدان استام ۋاقىتتا ەڭ مىقتى, كاسىبي ۇجىممەن بىرگە جاۋاپتى كەزەڭدەردى ەڭسەرىپ, ماقسات ەتىپ قويعان جوبالاردى جۇزەگە اسىردىق. كورپوراتسيانىڭ قازىرگى ۋاقىتتاعى جەتىستىكتەرى ارىپتەستەرىمنىڭ ءوز ىسىنە ادالدىعى مەن تىنىمسىز ەڭبەگىنىڭ جەمىسى. وسى كەزەڭدە قىزمەتكەرلەردىڭ الەۋمەتتىك جاعدايىن جاقسارتىپ, كاسىبي دامۋىنا قولايلى ورتا قالىپتاستىرۋعا تىرىستىم. سەبەبى جايلى ەڭبەك ورتاسى ناتيجەلى جۇمىستىڭ, تۇراقتىلىق پەن تابىستىڭ نەگىزى دەپ ەسەپتەيمىن. قازاق تەلەۆيزياسىنىڭ قاراشاڭىراعى سانالاتىن ۇيىمدا بۇعان دەيىن تالاي جەتەكشىلەردىڭ وزىنە لايىق قولتاڭباسى قالدى. بۇل ساباقتاستىق جالعاسىن تابۋى قاجەت. ۋاقىتپەن بىرگە باسشىلاردىڭ دا الماسىپ, ۇيىم جۇمىسىنا جاڭا تىنىس, جاڭا سەرپىن بەرىلىپ وتىرۋى كەرەك دەپ ەسەپتەيمىن.
بۇل شەشىمىمە قولداۋ بىلدىرگەن سالا مينيسترىنە العىس ايتامىن. مەن ءارى قاراي دا وتاندىق تەلەۆيزيا سالاسىنىڭ دامۋىنا ەڭبەك ەتەمىن», — دەدى ءلاززات تانىسباي بۇگىن كورپوراتسيا جەتەكشىلەرىمەن وتكەن كەزدەسۋىندە.
ل.تانىسباي «قازاقستان» رەسپۋبليكالىق تەلەراديوكورپوراتسياسىن 2019 جىلدىڭ ءساۋىر ايىنان بەرى باسقارىپ كەلدى. ەندى ول بۇگىننەن باستاپ «ەۆرازيا» ءبىرىنشى ارناسىنا» جەتەكشىلىك ەتەدى.
