لەگيونەرلەر ءبىزدىڭ كوك پاسپورتتى تەك اقشا تابۋ, سانكتسيانى اينالىپ ءوتۋ, چەمپيون بولۋ ءۇشىن عانا پايدالانادى – ارمان شوراەۆ

فوتو: Alash.kz

«شەتەلدىك لەگيونەرلەر ءبىزدىڭ ەلىمىزگە قانشالىقتى قاجەت? ولار ءبىزدىڭ كوك پاسپورتتى تەك اقشا تابۋ, سانكتسيانى اينالىپ ءوتۋ, چەمپيون بولۋ ءۇشىن عانا پايدالانادى. وليمپياداعا جۇمسالىپ جاتقان ميللياردتاعان اقشانى بالالار سپورتىنا, ءتۇرلى سەكتسيالارعا باعىتتاۋ كەرەك.

ءوزىمىزدىڭ مىقتى بالالارىمىز جەتەرلىك. سىرتتان سپورتشىلاردى اكەلىپ, نەسىنە اۋرەلەنەمىز?». بۇل پىكىردى بەلگىلى قوعام قايراتكەرى, كاسىپكەر ارمان شوراەۆ ALASH.KZ ۇلتتىق پورتالىنا بەرگەن سۇحباتىندا ايتتى.

«شەتەلدىك لەگيونەرلەر ءبىزدىڭ ەلىمىزگە قانشالىقتى قاجەت? افريكالىق جەلاياققا ازاماتتىق بەرىپ, ەلىمىزگە الىپ كەلدىك. وسىدان 10-15 جىل بۇرىن قىتايدان اۋىر اتلەتيكادان لەگيونەرلەردى تارتىپ, تاعى 2-3 قىزدى الىپ كەلدىك. بۇل سپورتشىلار ەلىمىزگە جالپى نە ءۇشىن قاجەت? ولاردىڭ اتى قازاق پا, زاتى قازاق پا?! تەننيسشىلەردىڭ ىستەپ وتىرعان تىرلىگىن كورىپ وتىرمىز. ولارعا تەك قانا شيرما كەرەك. ءبىزدىڭ كوك پاسپورتتى تەك اقشا تابۋ, سانكتسيانى اينالىپ ءوتۋ, چەمپيون بولۋ ءۇشىن عانا پايدالانادى. ءبىتتى! سوندىقتان وليمپياداعا جۇمسالىپ جاتقان ميللياردتاعان اقشانى بالالار سپورتىنا, ءتۇرلى سەكتسيالارعا باعىتتاۋ كەرەك. سوندا بىزگە شەتەلدەن قاڭعىپ كەلگەن حوككەيشىلەردى, فۋتبولشىلاردى جالداۋدىڭ قاجەتى بولمايدى. قۇدايعا شۇكىر. ءوزىمىزدىڭ مىقتى بالالارىمىز جەتەرلىك. جۋىردا مەن ءبىر جاتتىعۋعا باردىم. جاقىن دوسىمنىڭ ۇلى حوككەيمەن اينالىسادى. سول جاتتىعۋدا قازاقشا سويلەپ جۇرگەن ءوزىمىزدىڭ قارا دومالاقتاردى كورىپ, قاتتى قۋاندىم. سىرتتان سپورتشىلاردى اكەلىپ, نەسىنە اۋرەلەنەمىز? نەگە ءبىزدىڭ جاتتىقتىرۋشىلار شەتەلدەن «مەرزىمى ءوتىپ كەتكەن» فۋتبول كوماندالارىن جالدايدى? ويتكەنى, ولار وزدەرىنە وتىرىك جالاقى تاعايىنداپ, سول جالاقىنىڭ جارتىسىنان كوبىن ءوز قالتالارىنا سالىپ الادى. بۇل سپورت سالاسى ۇلكەن ءبىر بيزنەسكە اينالعان. سوندىقتان كاسىبي سپورتتى, ونداعى ۇلكەن جوبالاردى بيۋدجەتتەن قارجىلاندىرۋدى دوعارىپ, بۇل سالانى جەكە بيزنەس وكىلدەرىنە بەرۋ كەرەك. سپورت مەملەكەتتىڭ قاتىسۋىنسىز, كاسىپكەرلەردىڭ دەمەۋشىلىگىمەن دامۋى كەرەك»,- دەيدى ارمان شوراەۆ.