لگبت-عا قارسى پەتيتسيا: بالاەۆا قانداي شەشىم شىققانىن ايتتى

• كوللاج Ulysmedia.kz

مادەنيەت جانە اقپارات ءمينيسترى ايدا بالاەۆا لگبت-عا قارسى پەتيتسيا بويىنشا قانداي شەشىم شىققانىن ايتىپ بەردى, دەپ حابارلايدى Ulysmedia.kz.

– بيىل 10 ماۋسىمدا لگبت-نى اشىق جانە جاسىرىن تۇردە ناسيحاتتاۋعا تولىق تىيىم سالۋ تۋرالى ءوتىنىش كەلىپ ءتۇستى. بۇل ماسەلە قوعامنىڭ ۇلكەن رەزونانسىن تۋعىزىپ, قىزۋ پىكىرتالاسقا جالعاستى. ويتكەنى قازىر مەملەكەت تاراپىنان ادام قۇقىعىنا كوپ كوڭىل ءبولىنىپ وتىر. سونداي-اق, قازاقستاندىقتار قوعامدىق ماڭىزدى تاقىرىپتاردى تالقىلاۋعا جانە مەملەكەتتىك ساياساتتى قالىپتاستىرۋعا بەلسەندى اتسالىسۋدا.

جۇمىس توپتارىنا 45 ادام كىرگەن. ولاردىڭ ىشىندە قۇزىرلى مەملەكەتتىك ورگانداردىڭ وكىلدەرى, پارلامەنت دەپۋتاتتارى, قوعامدىق بىرلەستىكتەر, ساراپشىلار مەن بارلىق مۇددەلى تاراپتار قاتىستى. پەتيتسيادا كوتەرىلگەن ماسەلەلەردى رەتتەۋدە حالىقارالىق تاجىريبە زەرتتەلگەن.

– بۇل جۇمىس پەتيتسيا بويىنشا تۇپكىلىكتى شەشىم قابىلداۋعا جەتكىلىكسىز. زەرتتەۋلەر مەن تالقىلاۋلار قازىر بۇل باعىتتا اۋقىمدى جۇمىستاردى جالعاستىرىپ, ماسەلەنى جان-جاقتى زەردەلەپ, ونى رەتتەۋدىڭ ناقتى تەتىكتەرىن ازىرلەۋ كەرەكتىگىن كورسەتتى. بۇل ۋاقىتتا قاجەت ەتەدى. دەگەنمەن, مادەنيەت جانە اقپارات مينيسترلىگىنىڭ ۇستانىمى: كامەلەتكە تولماعانداردىڭ قۇقىعىن قورعاۋ جانە قاۋىپسىزدىگىن قامتاماسىز ەتۋ تۇرعىسىنان پەتيتسيانى ءىشىنارا قولداۋ, بالالارعا جىنىستىق قول سۇعۋعا قارسى قىلمىستاردىڭ ءوسۋ اياسىندا جاسوسپىرىمدەر مەن بالالاردى جىنىستىق قاتىناستاردى, ونىڭ ىشىندە ءداستۇرلى ەمەس قاتىناستاردى ناسيحاتتاۋ مەن كۋل جاساۋدان قورعاۋ تالابى وزەكتى ءارى قاجەت. بالالاردىڭ قاۋىپسىز اقپاراتتىق ورتادا ءوسىپ, دامۋى اسا ماڭىزدى. ءبىزدىڭ ۇرپاق الدىنداعى پارىزىمىز – ولارعا دۇرىس رۋحاني ادامگەرشىلىك, باعىت-باعدار بەرىپ, ءداستۇرلى وتباسىلىق قۇندىلىقتاردى بويىنا ءسىڭىرۋ. ۇلتتىق مادەني مۇرانى ۇستانۋعا جانە گەنەتيكالىق كودتى ساقتاۋعا جاعداي جاساۋ وتە وزەكتى, – دەيدى ايدا بالاەۆا.

كەشە استاناددا لگبت ناسيحاتىنا قارسى جيىن وتكىزىلگەن. مادەنيەت مينيسترلىگىنىڭ وكىلى «لگبت ناسيحاتىنا» قارسى پەتيتسيا تۋرالى ءوز پىكىرىن بىلدىرگەن ەدى. جيىن بارىسىندا لگبت ناسيحاتىنا قارسى ازاماتتار دا (ونىڭ ىشىندە ءماجىلىس دەپۋتاتى ەدىل جاڭبىرشين دە بار), پەتيتسياعا قارسى شىقققاندار دا سويلەدى. پەتيتسيانى قولداۋشىلار ۇلتتىق تانىم-تۇسىنىككە, تاربيەگە قارسى ەكەنىن ايتىپ, مۇنىڭ ەل دەموگرافياسىنا كەرى اسەرىن تيگىزەتىنىن ايتسا, پەتيتسياعا قارسىلار قۇجات كۇشىنە ەنسە, بۇل ادام قۇقىعىن شەكتەۋ ەكەنىن ايتتى. جيىندا لگبت وكىلى ەكەنىن اشىق ايتقان ادامدار دا بولدى.