لگبت ناسيحاتى تۋرالى زاڭ: تانىمال ترانسگەندەردىڭ ءولتىرىلۋى نارازىلىق تۋدىردى

فوتو: bbc.com

گرۋزيادا ترانسگەندەر ايەل كەساريا ابراميدزەنى ءولتىردى دەپ ايىپتالعان كۇدىكتى ۇستالدى. بۇل تۋرالى qandastar.kz اقپارات اگەنتتىگى ۆۆس-گە سىلتەمە جاساپ حابارلايدى.

37 جاستاعى مودەل جانە گرۋزياداعى ەڭ تانىمال ترانسگەندەرلەردىڭ ءبىرى 18 قىركۇيەكتە تبيليسيدەگى پاتەرىندە ءولى كۇيىندە تابىلعان.

پوليتسيا جەدەل ىزدەستىرۋ شاراسىندا كىسى ءولتىردى دەگەن كۇدىكپەن 26 جاستاعى ەر ادامدى ۇستادى. تەرگەۋشىلەردىڭ مالىمەتىنشە, ۇستالعان ازامات ابراميدزەمەن جانجالداسىپ, بىرنەشە رەت پىشاق جاراقاتىن سالعان, سودان كەيىن قىلمىس ورنىنان بوي تاسالاعان.

ابراميدزە العان جاراقاتىنان وقيعا ورنىندا كوز جۇمعان. ىشكى ىستەر مينيسترلىگىنىڭ مالىمەتىنشە, ايعاق رەتىندە قىلمىس جاسالعان قارۋ – پىشاق تاركىلەنگەن.

پوليتسيا ۇستالعان ادامدى اتى-ءجونىنىڭ باس ارىپتەرىمەن ب.دج دەپ اتاعانىمەن, كوپتەگەن گرۋزيالىق جانە شەتەلدىك باسىلىمدار ونىڭ تولىق اتى-ءجونىن جاريالاپ, كۇدىكتىنىڭ تبيليسي بارلارىنىڭ بىرىندە كۇزەتشى بولىپ جۇمىس ىستەيتىنىن حابارلادى.

گرۋزين تەلەارنالارى ابراميدزەنىڭ كىرە بەرىسىندەگى كامەرالارعا تۇسىرىلگەن كادرلاردى تاراتتى, ۆيدەودان ۇستالعان ەر ادامنىڭ ليفت كۇتىپ, ءبىراز ۋاقىتتان كەيىن باسپالداقپەن تومەن قاراي جۇگىرگەنىن كورۋگە بولادى.

كوپتەگەن تەلەشوۋلارعا قاتىسقان جانە ءوزىنىڭ جىنىستىق ەرەكشەلىگىن جاسىرماعان ابراميدزەنىڭ ءولتىرىلۋى گرۋزيادا نارازىلىق تۋدىردى.

قاندى قىلمىس بيلىكتەگى «گرۋزين ارمانى» پارتياسىنىڭ «لگبت ناسيحاتىمەن كۇرەسۋ» جانە وتباسىلىق قۇندىلىقتاردى قورعاۋ ۇرانىمەن جۇرگىزگەن سايلاۋ ناۋقانى اياسىندا جانە پارلامەنتتىڭ لگبت وكىلدەرىنىڭ قۇقىقتارىن شەكتەيتىن زاڭنامانى قابىلداعانىنان كەيىن ءبىر كۇن وتكەن سوڭ ورىن العان.

بەيسەنبى كۇنى كەشكە تبيليسيدەگى پارلامەنت عيماراتىنىڭ الدىندا ابراميدزەنى ەسكە الۋعا ارنالعان ءۇنسىز اكتسيا ءوتتى. ابراميدزەنىڭ سۋرەتىنىڭ قاسىنا ادامدار گۇل شوقتارىن اكەلىپ, شىراق جاعىپ قويدى. بەلسەندىلەر پارلامەنت قابىلداعان زاڭناماعا نارازىلىق بىلدىرگەن پلاكاتتارىن اشتى.

«قابىلدانعان بۇل زاڭ زورلاۋشىلاردى. گرۋزيادا ءبىز كورىپ وتىرعان نارسە رەسەيلىك ءفاشيزمنىڭ مىسالى, ويتكەنى بۇنى پۋتين رەسەيدە زاڭداستىردى. وسىنىڭ سالدارىنان رەسەيدەگى جىنىستىق ەرەكشەلىگى بار ادامدار سوڭعى ونجىلدىقتا زورلىق-زومبىلىققا ۇشىراپ, ەلدەن قاشىپ ءجۇر», – دەدى Tbilisi Pride قوزعالىسىنىڭ باسشىسى تامار دجاكەلي.

ەسكە سالساق, بۇعان دەيىن گرۋزيا پارلامەنتىنىڭ لگبت ناسيحاتىنا تىيىم سالاتىن زاڭ جوباسىن ماقۇلداعانى تۋرالى جازعان ەدىك.