Jańalyqtar
Londonda qazaqsha sóıleý klýby ashyldy
Londondaǵy Qazaq ortalyǵy jáne eriktiler toby qazaqsha sóıleý klýbyn ashty. Maqsaty uly Abaı tilin meńgergisi keletin sheteldikter men qandastarymyzdyń basyn biriktirip, tildik orta qalyptastyrý.
Klýbtyń tusaýkeser rásimine Kazinform-nyń Tumandy Albıondaǵy tilshimiz Ǵalymjan Qaramanuly qatysyp qaıtty.
Stıv Skrıýtın — qarjy salasynyń mamany. Aǵylshyn jáne orys tilderinde erkin sóıleıdi. Endi mine qazaq tilin meńgergisi bar. Sharýalaryn ysyryp qoıyp, búgin osynda keldi. Sóıleý jáne tildi túsiný daǵdylaryn jetildirý úshin kóp eńbektený kerektigin Stıv moıyndaıdy.
«Men endi bastap jatyrmyn. О́zimmen deńgeıles til úırenýshilerdi taptym. Bul tildi tez meńgerýime kóp kómegin tıgizedi dep oılaımyn. О́ıtkeni sózdik qoryń jáne tildik bazań olarmen birdeı bolady», — deıdi Stıv Skrıýtın.
Sheteldikterdiń qazaq tilin úırenýdegi maqsaty ár-alýan. Biri Qazaqstanǵa týrıstik saparmen barǵysy keledi. Endi biriniń jubaıy qazaq ultynan. Qazaqtildi adamǵa ǵashyq bolyp qalǵandar da kezdesedi. Taǵy biriniń qazaq avtorlarynyń shyǵarmalaryn túpnusqada oqyp, túsingisi bar.
«Aǵylshyn tiliniń muǵalimi bolǵan soń basqa tilderdi de meńgergim keledi. Qazaq tiliniń dybystalýy óte unaıdy. О́tken jyly ózdigimmen úırenýge tyrystym. Biraq olaı qyzyq emes eken. Dybystalýyn este saqtaý qıyn jáne eshkimmen sóılese almaısyń», — deıdi aǵylshyn tiliniń muǵalimi Sebastıan Dann.
