LRT-nyń alǵashqy vagondary relsterge qoıylyp jatyr

Astanaǵa jaqynda ǵana kelgen kók vagondar arnaıy tehnıka kómegimen relsterge ornatylyp jatyr. Olar qyrkúıekke josparlanǵan synaqtyq iske qosýǵa daıyndalýda, dep habarlaıdy Qandastar.kz aqparat portaly.

Elordaǵa jeńil relsti kóliktiń alǵashqy eki quramy jetkizildi. Árbir quram tórt vagonnan turady jáne olar arnaıy jabdyqtalǵan avtotraılerlermen jetkizildi.

«Vagondar Qytaıdyń Tanshan qalasynda óndirilgen. Avtokólikpen jetkizý Qytaı men Qazaqstan aýmaǵy arqyly ótetin, uzyndyǵy 5 300 shaqyrymnan asatyn marshrýtpen júzege asyryldy. Barlyq jol 10 kúnge sozyldy. Vagon bólikterin avtotraıler platformalaryna tıeý zaýytta krandardyń kómegimen júrgizildi», — dep habarlady qalalyq kólik júıesinde.

Qalalyq kólik júıesiniń málimetinshe, uzyndyǵy 60 metrge jýyq poıyzdar tolyqtaı avtomattandyrylǵan GOA 4 júıesimen jabdyqtalǵan. Bul júıe poıyzdardyń esikterin ózdiginen ashyp-jabýǵa, toqtaýǵa jáne jyldamdyqty arttyrýǵa, depoǵa kirip-shyǵýǵa, vagondardyń jaı-kúıi men araqashyqtyǵyn baqylaýǵa múmkindik beredi. Basqarý júıesi tolyqtaı pılotsyz, alaıda operatorlar olardyń jumysyn únemi baqylap otyrady. Jolaýshylardyń jaılylyǵy men qozǵalys sapasyn arttyrý úshin vagondar óndirisinde zamanaýı, jeńil jáne berik materıaldar paıdalanylǵan.

Jyljymaly quramnyń jalpy tehnıkalyq sıpattamalary:

uzyndyǵy: 59,97 m,

eni: 2,8 m,

bıiktigi: 3,8 m,

qýat kózi: úshinshi rels, 750 V,

syıymdylyǵy: 600-den astam jolaýshy,

eń joǵary jyldamdyq: 80 km/saǵ,

ortasha paıdalaný jyldamdyǵy: 39,5 km/saǵ,

salmaǵy: 94 t (jolaýshylarsyz).

Vagondardy satyp alý jáne jetkizý EPC-shart aıasynda júzege asyryldy, qosymsha bıýdjet qarjylandyrýy qajet bolmady.

Eske sala keteıik, bıylǵy jyldyń qyrkúıek aıynda tehnıkalyq iske qosýdan keıin LRT-nyń jolaýshylar tasymalyna arnalǵan tolyqqandy iske qosylýy 2026 jyldyń kóktemine josparlanyp otyr.